DAVAO DEL NORTE -- Patay ang kanhi sundalo human gipusil sa wala mailhing mamumuno samtang padulong nga mohatud sa iyang anak sa tunghaan.
Ang insidente nahitabo sa Purok 2, Durian Barangay Apokon, Tagum City alas 7 sa buntag Miyerkules, Pebrero 26.
Ang biktima giila nga si Cornelio Migo, 54, kanhi sakop sa Philippine Army ug molupyo sa Barangay Apokon sa dakbayan.
Sumala sa imbestigasyon sa Tagum City Police Station, nasayran nga biktima padulong nga mohatud sa iyang anak sa eskuwelahan apan samtang naglabigar sakay sa gimanehong motorsiklo, usa ka wala mailhing armado ang mitungha sa dalan ug gipusil siya tumong sa lawas kinsa namatay gilayon.
Hinuon, luwas ang iyang anak.
Dugang gibutyag sa imbestigador nga ang biktima kasamtangang nag-negusyo og computer-ran ug gawas niini, namasada og habal-habal.
Narekober gikan sa crime scene ang duha ka mga basiyo sa bala sa kalibre .45 nga pistola.
Padayon ang gihimong imbestigasyon sa kapulisan sa siyudad sa Tagum. (Dexter T. Visitacion)