Sugilanon: Napukaw nga tanlag

Sugilanon: Napukaw nga tanlag

NADAWAT na ni Konsehal Pedro Pandaka ang kamandoan sa Sandiganbayan nga siya masuspenso sa iyang pagka opisyal sa lokal nga kagamhanan. Nasuspenso siya sa pagdupa niya sa kaso sa iyang sinagop nga anak nga nakahimog salaod. Gimaniubra niya ang kaso sa iyang anak nga lalake nga ang biktima sa iyang anak gipugngan ug gitago niya sa hilom. Wala mopatim-aw ang biktima sa gihimong imbestigasyon sa kapulisan. Obstruction of justice ang iyang gihimo. Nahibaloan sa kapulisan nga si Pandaka mihaylo sa biktima nga aregluhon na lang ang kaso ug dili na magpa-imbestigar. Apan ang biktima wala magpahaylo ug misumbong kini sa kapulisan.

Angay ba siyang mo-apelar kun mohangyo sa Kinatas-ang Hukmanan? Nabuksan pagbalik ang kaso sa nangagi. Badlungon ang iyang anak nga sinagop nga si Jackpoy; sugarol, palahubog ug himababaye, ug labaw sa tanan, tahor ug dagmalan. Dili mabadlong ang iyang anak. Na-kunsumisyon usab ang iyang asawa. Apan ila kining duphan sa tanang mga kabuang niini.

Naukay na usab ang katawhan sa katilingban sa gipakanaog nga hukom gikan sa Sandiganbayan. Nakahugaw kini sa iyang pagka magsasangyaw sa mga pulong sa Ginuo.

Sa miaging piniliay midagan siya pagka konsehal ug napili sa katawhan maskin nadaot ang iyang ngalan tungod sa binuhatan sa iyang anak. Sa bata pa si Jackpoy iya na kining gikauban sa pagpanuroy ug mao say tigdala sa Bibliya ug uban pa niyang mga basahon. Nakabati kini sa mga pulong sa Ginuo. Apan unsa bang pagka unsaa nga naulipon man kini sa gahom ni Satanas?

Kadaghanan nakasaway kang Konehal Pandaka sa iyang pagdupa sa mga kaso sa iyang anak nga si Jackpoy. Apan may mga tawo nga maunungon kaniya ug milaban ug mipatin-aw sa iyang binuhatan isip usa ka amahan nga mopaluyo ug molaban gayud sa iyang anak bisan unsa kini ka makasasala. .

Miabot na ang punto sa iyang asawa nga si Delilah nga moyukbo na lang siya. “Pedro, wa gihapon mausab ang atong anak bisan atua na gibalhog sa bilanggoan. Nag-adis-adis na hinuon didto.”

Nahalup-op ang kalag ni Pedro. “Bayran ko ang akong kasaypanan? Mao ba?”

“Gisuspenso ka ra, Pedro. Makabalik ka ra sa imong pangatungdanan.”

Nakahukom si Padro. Miyukbo siya sa hukom sa Sandiganbayan. Apan pagkatapos sa iyang suspenso, nahibaloan na lamang niya gikan sa iyang asawa nga ang ilang anak nakapatay sulod sa bilanggoan.

Dihang gisukna siya sa katawhan sa katilingban kon modupa na ba usab siya sa kaso sa yang anak, miingon na lang siya nga naghangad sa Kahitas-an, “Ang Ginuo nay mahibawo kaniya!“ (Katapusan)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph