BAYNTE-SAIS ka mga Korean nationals nga gikan sa Daegu City sa North Gyeongsang sa Probinsya sa South Korea nga niabot dinhi sa Sugbo Martes sa gabii, Pebrero 25, 2020, ang gipangita karon sa Bureau of Quarantine.
Ang maong Korean nationals anaa sa Sugbo isip mga turista.
Matod ni Dr. Jaime Bernadas, pangulo9 sa Department of Health (DOH)-Central Visayas, nga gikonsiderar na nga persons under monitoring (PUMs) bisan og wala sila makitai og sintomas.
Apan sanglit gikan man sila sa lugar nga aduna nay kaso sa coronavirus disease 2019 (Covid-19), gikinahanglan nga monitoron ang mga turista.
Kon masuta na ang nahimutangan sa mga langyaw, gi-abisohan ang mga hotel o gipuy-an niini nga kinahanglan nga dili pagawson ang mga langyaw sa ilang lawak og i-monitor kini.
Gawas lang kun mo-desisyon ang Korean Embassy nga papaulion sila.
Adunay 22 ka flight matag semana gikan ug padulong sa Daegu City, Gyeongsang Province sa South Korea.
Apan matod ni Dr. Terrence Anthony Bermejo, hepe sa Bureau of Quarantine sa Central Visayas, nga ni-menos na ang flight human sa outbreak sa Covid-19 sa South Korea.
Matod ni Bernadas nga kon mopakita og sintomas sa Covid-19 ang mga langyaw, mahimo na sila nga patients under investigation (PUIs) ug i-admit kini diretso sa tambalanan.
Si Gobernador Gwendolyn Garcia nagkanayon nga ang mga pasahero nga mga Pinoy o kadtong permanent resident visa holder nga gikan sa nahisgutang probinsya nga moabot sa Sugbo mao lang una ang ipaubos sa mandatory quarantine sulod sa 14 ka adlaw.
Kini tungod ang travel ban, gi-limit pa man sa maong lugar.
Susamang protocol usab ang subayon sa quarantine period ubos sa Executive Order nga giluwatan ni Garcia.
Samtang ang mga pasahero nga dili molupyo sa Sugbo papaulion sa ilang lugar ug didto ipaubos sa quarantine.
Katong mga Korean national nga gikan sa maong probinsya sa South Korea nga moabot sa Mactan Cebu International Airport dili na tugotan pa nga makanaog sa eroplano tungod ibalik sila didto sa ilang point of origin.
Gitataw hinoon ni Garcia nga ang ilang ipatuman nga sistema diri sa Sugbo mag-agad sa desisyon sa Inter-Agency Task Force on Emerging Infectious Disease (IAFT-EID).