Tulo ka mga wanted nadakpan

Tulo ka mga wanted nadakpan

TULO ka mga tawo nga wanted sa managlahing mga kaso sa Central Visayas nadakpan sa Regional Intelligence Unit (RIU) 7 sa managlahi nga mga dapit niadtong Martes, Pebrero 25, 2020.

Ang RIU 7 pinangulohan ni Police Lt. Col Arturo Brual Jr., milusad sa Manhunt Charlie uban sa mga police station diin nagtago ang tulo.

Mga nadakpan mao sila si Renilo Balolong, Rene del Rosario Jr. ug Tedjay Galagatan.

Si Balolong nadakpan sa Barangay Catamboan, Lazi, Siquijor pinasikad sa warrant of arrest sa kasong illegal drugs nga giluwatan sa Regional Trial Court (RTC) Branch 46 sa lungsod sa Larena.

Ang korte nitakda og P200,000 nga piyansa alang sa iyang temporaryong kagawasan. Ikaduhang nadakpan si Del Rosario, alyas Dela Rosa. Siya nasikop sa Sityo Danao, Barangay Calango, lungsod sa Zamboangueta, Negros Oriental.

Si 4th Judicial Region RTC Judge Panfilo Salva sa Palawan niluwat og warrant of arrest sa kasong murder.

Si del Rosario akusado sa pagpatay sa usa ka Marcos Geronimo sa Aborlan, Palawan niadtong 2003.

Ang akusado nagtago-tago hangtod nga permanente nang nanimuyo sa Zamboangueta pinaagi sa pagpangalyas og ngan.Nakuhaan siya og shotgun ug mga bala.

Ang ikatulong nadakpan mao si Galagatan, kinsa nangalyas og Michael Acaso. Si Galagatan didto na nagpuyo sa K-3rd Kamuning, Quezon City.

Si Galagatan akusado sa paglugos sa 6 nga batang babaye niadtong 2013 sa lungsod sa Loay Bohol.

Way piyansang gitugot ang korte alang sa iyang temporaryong kagawasan. Dunay P130,000 nga patong sa ulo alang sa iyang pagkasikop.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph