GIAWHAG sa chairman sa Philippine Councilors League (PCL) sa Central Visayas ang iyang mga kauban nga di magpadala sa gikataho nga vote-buying para sa eleksyon karong adlawa nga ipahigayon sa kaulohan.
Si Konsehal Raymond Garcia sa Cebu City niingon nga kinahanglan nga ilang ipadayag ang ilang tingog ug mopili base sa ilang kagustohan ug gituohan nga haom sa katungdanan.
Ang pamahayag ni Garcia iyang giluwatan human nipadayag sa iyang pagka-dismaya si incumbent PCL Chairman Danilo Dayanghirang sa Davao City kinsa ni-alegar nga namalit og boto ang ilang kaatbang pinaagi sa pagdeposito og P7.3 milyones ngadto sa PCL bank account isip registration sa 583 ka mga konsehal.
Base kini sa iyang Facebook post.
“The said check is already a proof of blatant vote buying giving undue influence to the outcome of the supposedly independent exercise directly under the supervision of Department of the Interior and Local Government (DILG),” padayag ni Dayanghirang.
Ang PCL adunay 17,163 ka mga sakop nga konsehal sa tibuok nasod para sa 11th National Congress, kinsa mopili og bag-ong officers gikan sa chairman, president hangtod sa katapusang board member.
Ang PCL adunay P15,000 isip registration fee.
“The councilors are traveling under official business and the registration is chargeable under local government funds,” dugang ni Dayanghirang.
Si Dayanghirang subli nga magpapili isip chairman sa PCL atbang sa grupo ni Jesciel Richard Salceda sa Albay. Si Salceda pag-umangkon ni Kongresista Joey Salceda.
Subli usab nga magpapili sa iyang posisyon isip national president sa PCL si Tata Sala sa Davao City nga gisuportahan ni Salceda, kansang grupo gipaluyohan ni Presidente Rodrigo Duterte.
Kasaligang tinubdan niining mantalaan nagkanayon nga gitagaan og P2,500 ang matag miyembro sa PCL aron suportahan ang grupo ni Salceda nga mo-challenge sa liderato nila ni Sala ug Dayanghirang.
Ang chairman sa PCL nipadangat na sa iyang reklamo ngadto kang Department of the Interior and Local Government Secretary Eduardo Año aron pormal nga mapahibawo sa gibuhat sa kampo sa ilang kaatbang.
Gumikan niini, si Dayanghirang niduso sa iyang disqualification batok kang Salceda sanglit na-kumpromiso ang posisyon nga iyang subli nga papilian gumikan sa giingong vote-buying. (PAC)