ITUGYAN na sa supplier ngadto sa Cebu City Government ang 22 ka coasters sa Lunes, Marso 2, 2020.
Si Atty. June Maratas, pangulo sa Department of General Services (DGS) ug chairman sa Bids and Awards Committee (BAC) para sa goods, nagkanayon nga nalangay ang delivery gumikan sa problema sa garahe.
Gipadayag ni Maratas nga naka-deliver na og unom ka units ang Hyundai ug ang 16 ka units kasamtangan pa nga giparada sa yarda sa supplier duol sa Edgar Cokaliong street sa North Reclamation Area.
Ang Cebu City Government nigahin og P88 milyones alang sa maong proyekto. Ang mga unit ihatag ngadto sa mga barangay nga sagad nahimutang sa urban areas.
Samtang gibutyag ni Maratas nga i-deliver sa RDAK ang nahabiling unom ka mga bus nga kauban sa 19 ka mga unit nga gigahinan og P133 milyones sa dili pa matapos ang Pebrero.
Dugang sa pangulo sa DGS nga kasamtangan nga giparada ang mga bus nga green og color sa motorpool sa Dakbayan sa Sugbo nga nahimutang sa South Road Properties (SRP).
Sa miaging tuig, dunay mga bus nga gitugyan na ngadto sa Siyudad aron unta ipanghatag ngadto sa mountain barangays.
Apan wa kini gidayon sa paghatag sa Siyudad tungod sa kadaku sa mga sakyanan ug kahagip-ot sa mga karsada sa kabukiran nga magmugna na hinuon og trapik ug kuyaw sa aksidente.
Ang City Hall nangita og laing matang sa sakyanan nga mas haum sa mga karsada sa mga barangay sa kabukiran nga hagip-ot agian. (PAC)