GIBUTYAG ni Joy Gallego, Gender and Development (GAD) officer sa Brgy. Basak, Dakbayan sa Lapu-Lapu, nga wa nila masubay kinsa ang mga ginikanan nga nagbilin sa usa ka semana pa lang nga masuso daplin sa karsada Brgy Basak.
Wa makuhai og footage sa closed circuit television (CCTV) sa mga establisemento sa lugar ang paglabay niini.
Maayo na hinuon nga pagkabutang ang masusong lalake gumikan kay anaa na karon sa iyang foster parent sa Norfil Foundation Inc. Ang masuso gibilin kilid sa karsada sulod sa usa ka sako bag sa may Brgy. Basak niadtong Sabado sa gabii sa wala maihing tawo.
Gipaubanan kini og kinutaw nga gatas lakip na ang instructions kon pila ka takos sa gatas ang kinahanglang ikutaw. Gibutangan usab kini og note nga niadtong Pebreo 15 kini natawo.
“Wala gyud nakita sa CCTV. Wala gyud didto nakita kinsay nagbutang og bag, pero naay nakakita daw, Sir. Dili siya moestorya maoy sulti sa akong kauban nga nagbutang didto sa bag,” matod ni Gallego.
Si Lapu-Lapu City Mayor Junard “Ahong” Chan una nang miawhag sa mga ginikanan sa pag turnover na lang sa ilang mga anak sa gobyerno kon ugaling di sila makabuhi niini inay nga ipanglabay ug ipangbilin sa bisag asang dapit.
Duha ka mga semana ang nakalabay, laing masuso usab ang napalgan sa Brgy. Babag nga patay na ug gipalangawan lang sa naglabay niini.
“Kining mga nagsabak kon dili nila kaya (pagbuhi), naay gobyerno motabang kanila sa paggasto sa ilang anak. Ako andam ko motabang sa ginikanan nga nagsabak,” matod ni Chan. (GCM)