TULO ka mga tawo ang nangaangol, usa kanila kritikal, human magbangga ang usa ka scooter ug PUJ sa alas 5 sa buntag sa Miyerkules, Pebrero 26, 2020 sa Fuente Osmeña rotunda, Dakbayan sa Sugbo.
Laing scooter ang napagan sa scooter nga unang naigo sa PUJ.
Si Police Cpl. Nino Dela Torre, imbestigador, niingon nga base sa ilang imbestigasyon, si Herbert Jade Pareja, nagmaneho sa Yamaha Mio nga mao ang sad-an kay ni-counterflow sa lane nga gisubayan sa 17D PUJ (biyahe og Lahug) nga gimaneho ni Alvin Castaneros.
Si Pareja naa sa kritikal nga kahimtang dihang gidala sa Vicente Sotto Memorial Medical Center (VSMMC).
Human maigo si Pareja, nilahos kini ngadto sa Yamaha Aerox scooter nga gimaneho ni Paul John Aton ug giangkasan ni Riza Mae Melgazo hinungdan sa pagkaangol sa duha.
Ang duha gidala usab sa tambalanan. Matod ni de la Torre nga si Pareja nga gikan sa General Maxilom Ave., niliko sa wala sa rotunda sugat sa mga sakyanan, inay sa wala.
Dinhi sila nagkasugat ni Castaneros.
Si de la Torre niingon nga human makita sa PUJ driver nga padung niya si Pareja, nihunong kini, apan nibangga kaniya ang scooter.
Sa pagkalagpot ni Pareja, iyang naigo sila si Aton ug Melgazo. Ilang susihon kon di ba hubog si Pareja atol sa bangga. (BBT)