KOMPYANSA si Gobernador Gwendolyn Garcia nga mahimong progresibo ang Dakbayan sa Naga ubos sa pagdumala ni Bise Mayor Kristine Vanessa Chiong human nipahawa na sa iyang katungdanan isip mayor ang iyang amahan, Val Chiong.
Matod ni Garcia, gianugnan siya sa serbisyo ni Valdemar Chiong sanglit nakasud-ong siya sa performance niini sa lugar gikan sa munisipalidad ngadto na sa pagkahimo niini nga siyudad sa 2007.
“He is such a hardworking and effective public servant and he was always at the forefront. First of all, in the transition between the municipality of Naga to the cityhood of Naga, he went through the difficulty of the flip-flopping decisions at that time. Unya dako kaayo to og impact sa ilang budget,” matod ni Garcia sa Pebrero 26, 2020.
Si Chiong misumiter sa iyang resignation letter sa Lunes, Pebrero 24, 2020.
Saysay ni Garcia nga bisan kon niingon si Chiong nga gikapoy na siya sa pagserbisyo, nagtuo siya nga nabuhat ni Chiong ang iyang dakong bahin ilabi na atol sa pagkamatay sa iyang igsuon.
“Siya pod was napugos into the mayorship. On my first term, vice mayor man to siya to. Then Mayor Enan Chiong, his brother, and there was the untimely demise. Nakalit og kamatay si Mayor Enan. Mao tong he had to take over and I believe wala man to siya maghuna-huna nga siya gyud ang mokupot sa pangagamhanan sa municipality of Naga but he had to and adtong tungura. Mao to nga siya ang naglingkod during those challenging times,” matod ni Garcia.
Buot ni Garcia nga makighinabi kang Chiong aron maminaw kon unsa ang mga rason sa iyang pagbiya. Atol sa paghatag sa resignation letter ni Chiong sa Kapitolyo, wala magka-atubang ang duha.
“But he has his own reasons and I believed that he has faith and confidence in the vice mayor who may take over. Vice Mayor Kristine Chiong and I share the same faith and confidence in the ability of then to be or soon to be Mayor Kristine Chiong in Naga’s progress”, matod ni Garcia.
Samtang gidayeg ni Garcia si Bise Mayor Kristine Vanessa Chiong tungod kay alang niya mahimo sa batan-ong Chiong nga mopuli sa iyang amahan ilabi na sa maayo nga liderato nga iyang gipakita sa panahon nga nahitabo ang trahedya sa syudad. Ang batan-on nga Chiong naka serbisyo niadtong 2017-2019.
“Sa akong pag tan-aw ug pagkaila niya, worthy and capable gyud. Gani nakaalagad naman siya isip mayor. Unya panahon to nga grabe sad kaayo ang challenge nga iyang giatubang pagkahitabo niadtong landslide nga nikalas og 78 lives. And to think that was her really, para nako, baptism of fire. But she handled it very well. So, I am very confident that si Vice Mayor Kristine will be able to sustain the growth and development that Naga has achieved under the stewardship of Mayor Val,” matod ni Garcia.
Niining tanan, matod ni Garcia, nga girespeto niya kon unsa man ang desisyon ni Chiong. Ang resignation letter ni Chiong epektibo sa Marso 16, 2020.