GIANGKON ni Lapu-Lapu City Mayor Junard “Ahong” Chan nga mas moubos pa og samot ang international nga turismo sa dakbayan kon ma-ban ang mga South Korean sa pagbisita sa nasod tungod sa sa padayong hulga sa coronavirus disease (COVD-19).
Duna nay kapin sa 1,000 nga nataptan sa Covid-19 sa South Korea, hinungdan nga gidid-an sa pagsulod ang mga South Korean nga gikan sa North Gyeongsang province, South Korea, ang epicenter sa Covid-19 sa mao nga nasod.
Niadtong mga Chinese national pa lang ang gi-ban una sa nasod, nihinay ang tourist arrivals sa dakbayan.
Ang mga Korean ug Chinese maoy duha sa nag-unang mga langyawng turista sa dakbayan.
Nunot niini, nagsige og tigom ang kagamhanan sa dakbayan sa mga resort owner alang sa paghingusog sa local tourism.
Usa sa sugyot sa kagamhanan ngadto sa mga resort owner mao ang pagtanyag og mga promo alang sa mga lokal nga turista aron dili sila magmingaw.
Pinaagi niini, maminosan gamay ang epekto sa kamingaw sa ilang mga guest.
“Naghimo ta’g laing strategy nga dili mahunong ang turismo sa atong lugar. Mao nang focus ta sa local tourist nga very affordable. Kon sa una mobayad sila og P12,000, P10,000, some P7,000. Probably we can down that into P4,000 or P4,500,” matod ni Chan.
Malaumon si Chan nga sa ngadtongadto, mobalik ra sa normal ang tourist arrival sa dakbayan human sa hulga sa Covid-19.
“Dako na kaayo ning tabang bisan na lang og pag-break even nga naa lang gyud at least di kaayo maalkanse. Anyway, it is just temporary,” matod ni Chan.
Gikwestyon ni Gobernador Gwendolyn Garcia ang desisyon sa Department of Education (DepEd) pag padayon sa Central Visayas Regional Athletic Association (Cviraa) ug uban pa nga kalihukan bisan sa risgo nga atubangon sa mga atleta ug ubang representante.
Matod ni Garcia nga kinahanglan nga sigurohong luwas ang mga tinun-an ilabi na nga ipahigayon kini sa layo nga dapit sa nasud. (GCM, ANV)