Menor,16, gipatay sa amahan

PATAY ang usa ka 16-anyos nga lalake human dunggaba sa iyang amahan pasado alas 4 sa kaadlawon sa Miyerkules, Pebrero 26, 2020 sa Purok Dama de Noche, Barangay Looc, Dakbayan sa Lapu-Lapu.

Ang anak mao si Christian Jay Gonzaga, samtang ang nakapatay kaniya mao si Carias Gonzaga, 42.

Matod ni Lucy Gonzaga, nagkalalis ang iyang anak ug bana nianang kaadlawon samtang sila nangatulog na unta nga misangpot sa pagpanunggab.

Giingong pulos nakainom ang iyang anak ug bana niadtong tungora dihang nauli sa ilang balay. Nakurat na lang siya nga kalit lang adunay komosyon human sa panaglalis.

“Ang akong nadunggan niingon ra akong anak nga, ‘Pa, tulog na didto, Pa, kay hubog naa kaayo ka.’ Niingon man pud siya nga ‘kinsa may hubog natong duha?’ Nya niana akong anak nga ‘ikaw ang hubog. Tug na diha kay sige ka panghilabot ug kuan niya.’ Niingon man siya ‘mopatay ra ba ko og anak, Dong.’ Mao niana to ako anak, ‘mopatay diay ka og anak? Patya ko, Pa.’ Mao na dayon to nagtuo ko gisumbag ra. Kutsilyo na man diay to,” matod ni Lucy.

Giingong wala magdahom si Lucy nga kutsilyo na diay ang gigamit sa iyang bana dihang gidapatan ang iyang anak.

Wa usab moreklamo ang iyang anak nga gidunggab siya sa iyang amahan.

Didto na siya makamatikod dihang pag ikatulong dapat sa iyang bana sa iyang anak, nalup-og kini gumikan sa samad dinunggaban.

Daling milaban ang umagad ni Lucy ug daling gidakdakan og hollow block ang ulo sa iyang bana. Dali niyang gidala sa tambalanan ang iyang anak, apan gideklarar ga dead on arrival (DOA).

“Igo ra man niya murag giwitik. Nagtuo ko kinumo ra. Mao to ako gituklod nga ‘buang man ka, imong anak imo mang kulatahon’. Didto na pag ikatulo ko nakakita nga kutsilyo na diay,” matod ni Lucy.

Nunot sa hitabo, desidido nga mopasaka og kaso si Lucy batok sa iyang bana sanglit dako ang iyang kahiubos sa gibuhat niini sa iyang anak.

Kon idayon ni Lucy, parricide ang kasong atubangon sa iyang bana, matod sa Police Station 3 sa Lapu-Lapu City Police Office LCPO.

Si Carias, sa iyang bahin, dihang nahinabi ning mantalaan, nipasabot nga gigunitan sa iyang anak ang iyang liog dihang nagkalalis sila hinungdan nga iyang nadunggaban.

Iya usab gihulagway ang iyang anak nga mosukol kaniya sanglit gisukmag na usab siya niini kaniadto.

Giangkon niya nga nakainom siya niadtong tungora, apan miklaro nga di siya mogamit og ginadiling drugas.

“Nasakitan naman gud ko. Nagmahay ko, pero murag nakalimot man sad ko. Sa tanan nakong anak kana ra man sad siya ang mosukol nako,” matod ni Carias.

Kon ugaling pasakaan siya og kaso sa iyang asawa, iyang atubangon ang kaso.

Si Lapu-Lapu City Mayor Junard Chan mipasalig nga adunay libreng lungon nga ihatag ang dakbayan ngadto kang Lucy sanglit nagpatabang kini sa mayor sa pagpahimutang sa iyang namatayng anak.

Pagpaninda og crispy fried chicken lang ang pangita ni Lucy. (GCM)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph