NAGKANAYON ang usa ka senior International Olympic Committee (IOC) member nga posibleng makanselar ang Tokyo Olympics ning tuiga kon dili makontrolar ang pagkuyanap sa coronavirus (COVID-19) sa ulahing bahin karong Mayo.
“In and around that time, I’d say folks are going to have to ask: ‘Is this under sufficient control that we can be confident about going to Tokyo or not?,’” matod ni Dick Pound sa interbyu sa The Associated Press.
Kon magpabilin ang hulga sa COVID-19, batbat ni Pound nga dako ang poruhan nga makanselar ang matag upat ka mga tuig nga kompetisyon o kaha mauswag kini sa lain nga petsa.
Ang 2020 Tokyo Games gikatakda karong Hulyo 24 hangtod Agusto 9 sa Japan.
“A lot of things have to start happening. You’ve got to start ramping up your security, your food, the Olympic Village, the hotels. The media folks will be in there building their studios,” pasabot ni Pound.
Kon delikado ang sitwasyon, asoy ni Pound nga maahat gyud ang IOC sa pagkanselar sa kompetisyon.
Ang viral outbreak nakatakod na og kapin sa 80,000 ka mga tawo ug nakapatay na og 2,700 diin kadaghanan niini gikan sa mainland China sukad sa pagsugod niini duha na ka mga buwan ang nakalabay.
Gikataho nga ang Japan adunay 150 ka kompirmadong mga kaso sa COVID-19.
Asoy ni Pound, kinsa kanhi Canadian swimming champion ug miyembro sa IOC gikan pa niadtong 1978, nga kapin sa 11,000 ka mga telta gikan sa 200 ka mga nasod ang gilaumang magtigi sa Tokyo Games.
Sukwahi sa pamahayag ni Pound, nagkanayon ang usa ka spokesman sa Japanese government nga si Yoshiide Suga nga madayon ang pagpahigayon sa kompetisyon basi sa nakaplano nang daan.
Gipasabot ni Suga nga ang gipanulti ni Pound dili opisyal nga pamahayag gikan sa IOC.
Sukad sa pagsugod sa Olympics niadtong 1896, katulo pa lang kini nakanselar – ka usa sa World War I ug kaduha sa World War II.
Ang Tokyo katapusang naka-host sa kompetisyon niadtong 1964. (AP, ESL)