SA LABING una niyang pagpakigharong sa kasamtangang No.1 overall pick nga si Zion Williamson, nagpakatap si LeBron James og 40 puntos aron agakon ang hosts Los Angeles Lakers ngadto sa 118-109 nga kadaugan batok sa New Orleans Pelicans kagahapon sa National Basketball Association (NBA).
Human sa duwa, gipadayag ni James ang iyang pagdayeg sa 19 anyos nga rookie ug iya kining nakitaan og hayag nga kaugmaon isip bag-ong lider sa Pelicans hulip kang Anthony Davis, kinsa katambayayong na karon ni James sa Lakers.
“He’s playing exceptional basketball,” matod ni James kabahin kang Williamson.
“I think his game is going to get better and better, just having that experience. I think today’s game is the perfect fit for his game. The high pace, the way they play, it fits his game. ... It works perfectly, and our game is so many possessions now, so much space, it’s perfect for his game, so he’s doing exceptionally well with that.”
Batok nila ni James ug Davis, kinsa pulos sab kanhi No.1 overall pick, si Williamson nipupo og 29 puntos ug unom ka rebounds.
Wala nakaduwa si Williamson sa unang duha ka mga duwa sa Pelicans batok sa Lakers gumikan nagpaalim kini sa iyang angol.
Taodtaod sab nga giatangan nga ikaparang ni Williamson ang duha ka All-Stars sa Lakers ug sa dihang nahinayon na kini, naghatag kini og katagbawan sa basketball fans.
“It was a great experience,” matod ni Williamson kabahin sa iyang pagpakigparang kang James. “He’s an incredible player. His resume speaks for himself. ... He handled business. He came out here and did what he had to do to help his team get the win.”
Kini maoy ikatulong higayon nga mingdaog ang Lakers batok sa Pelicans apan hugot ang pagtuo nila ni James ug Davis nga mahimong usa ka lehitimong title contender ang Pelicans sa pagpangulo ni Williamson.
“He’s a great player,” batbat ni Davis kabahin kang Williamson. “He’s got a quick first step. Very explosive. He’s going to continue to get better and better as he goes on.”
Si Davis nidugang og 21 puntos, 14 rebounds ug unom ka blocked shots alang sa Lakers.
Ang kanhi sakop sa Lakers nga si Brandon Ingram maoy nangulo sa Pelicans pinaagi sa iyang 34 puntos.
Ang Lakers ningsaka sa 44-12 nga rekord aron pahugtan ang ilang paggunit sa liderato sa Western Conference samtang ang Pelicans ningdakin-as sa 25-33 nga baraha, ika-10 sa West. (AP, ESL)