MISUMITER sa iyang resignation si City of Naga Mayor Valdemar Chiong ngadto kang Gov. Gwendolyn Garcia. Mo-resign siya sa iyang katungdanan effective March 16.
Talagsa ra man god ni mahitabo nga ang usa ka incumbent politician mo-resign sa iyang katungdanan. Nganong wala man lang huwata niya nga matapos ang iyang termino karong 2022 elections. Magpatay pa man gani nang uban.
Sa akong pagpakighinabi ni Mayor Chiong sa akong tulumanon sa dySS, duha ka rason ang gihatag sa mayor sa iyang pag-resign. Una, morag luya na kuno ang iyang panglawas sa pangidaron nga 59. Aduna kuno siyay arthritis nga nakaapekto sa iyang inadlaw nga panglihoklihok. Bata pa man ang edara uy. Ang uban gani diha bisan nagkango-kango na, molansar pa man gani. Unsa ra man god nang arthritis?
Ang ikaduhang rason nga gihatag ni Mayor Chiong mao ang iyang frustration o kasagmuyo sa sistema. Iyang gitumbok ang nahitabo kaniya. Bag-o lang siya mi-serve sa iyang 90-day preventive suspension nga gipakanaog sa Sandiganbayan gumikan sa kasong graft. Bunga kini sa kiha nga iyang giatubang sa Sandiganbayan.
Usa ka kompaniya sa liquefied petroleum gas (LPG) ang mikiha ni Chiong kay iyang gihatagan og pabor ang kakompetensiya niini. Gihatagan og business permit sa mayor ang maong kompaniya bisan kon walay certification sa Bureau of Fire Protection. Ang nakanindot kay nag-uliay na sa maayong kabubut-on ang duha ka kompaniya apan si Chiong maoy naapeki sa Sandiganbayan kay nag-atubang man siya og kaso.
Sa pangutana kon dili pa ang iyang anak nga si Vice Mayor Kristine Chiong ang iyang bise, mo-resign ba siya? Miingon siya nga dili. Apan dili pa gyud diay forever nga mo-retire sa pulitika si Chiong gumikan kay kon mabuak kuno ang first district, modagan siya pagka-kongresista. Dunay plano si first district Congressman Eduardo Gullas nga buk-on ang first district ngadto sa duha ka distrito. Aw, temporaryo lang diay’ng mopahuway si Chiong sa pulitika. Dili diay forever. (bobbygnalzaro@gmail.com)