Editoryal: Reklamo sa BHW

Editorial Cartoon by Ariel Itumay
Editorial Cartoon by Ariel Itumay

DUL-AN sa gatusan ka mga barangay health workers (BHW) sa dakbayan sa Sugbo ang gikataho nga mipasaka og reklamo ngadto sa buhatan sa Ombudsman-Visayas batok sa mga opisyal sa Cebu City Health Department.

Lakip sa giingong gipasakaan og reklamo mao ang City Health Officer nga si Dr. Daisy Villa, iyang assistant nga si Dr. Teresita Rodriguez ug ang BHW coordinator nga si Althea Lim.

Reklamo sa mga BHWs nga gipasaka niadtong Pebrero 14, mao ang grabing pagkadelatar sa ilang honorarium og kapin sa unom ka buwan.

Matod ni Cherlien Monte, ang pangulo sa BHWs, nga gihimong rason sa taga Cebu City Health Department (CCHD) kon nganong nadelatar kini mao ang kakulang sa mga rekisitos.

Kini sama sa profiling sa mga residente sa ilang tagsatagsa ka barangay.

Hinuon giangkon ni Monte nga wala sila makakuha sa target nga gustong ipaabot sa CCHD kalabot sa paghimo og profile sa mga residente.

Si Mira Lyn Castillo, vice president sa association sa BHWs, miyagyag nga nakasumiter na sila sa barangay profiling niadto pang Hunyo. Apan iyang gikuwestiyon ang pagpangayo niini og bag-ong profiling record sa barangay nga maoy usa sa hinungdan nganong kuwang ang ilang rekisitos.

Nakasabot ta sa gibati sa mga reklamante kay dili baya lalim ang kahago nga ilang giserbisyo sa barangay unya daw og sa masabot nga gilisod-lisod ra diay gihapon sila.

Atong girespetohan ang ilang pagdangop sa Ombudsman kay ila man usab kining katungod, pero dili kaha angay nga adto una sila mosangpit ug makig-atubang ni Mayor Edgar Labella aron didto mahapsay ang tanan?

Tingali baya og mahisama na hinuon ni sa ubang mga kaso nga anaa sa Ombudsman nga maabtan na lang og siyam-siyam dili gihapon madesisyonan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph