Teenage pregnancy gitutokan sa DepEd

GIHINGUSGAN karon sa buhatan sa Department of Education (DepEd) uban ang Provincial Population Office nga mapugngan ang pagsaka sa kasong teenage pregnancy dinhi sa lalawigan sa Misamis Oriental.

Tungod niini usa ka kampanya nga gitawag og Oplan Kalusugan ang gilusad karon sa matag tunghaan. Atol sa executive meeting sa Local School Board (LSB) nga gipangunahan ni Misamis Oriental Governor Bambi Emano dinhi gipasabot ni DepEd Misamis Oriental Schools Division Superintendent Mr. Jonathan Dela Peña nga hugot ang ilang pakigbatok sa teenage pregnancy.

Bout nila nga pahimangnoan ang mga kabatan-onan nga dili molambigit niining pre-marital sex ug kinahanglan nga makatoun sila kalabot sa reproductive health.

“Naa me gitawag sa DepEd nga ‘OK’ kon Oplan Kalusugan. Usa kini ka component sa reproductive health program. Under ana ang strategies how to eliminate the problem sa teenage pregnancy, kay I’m sure ang teenage pregnancy springs from the illiteracy and ignorance of our children regarding reproductive health. We conduct information drive through our Oplan Kalusugan task force every district,” matud ni Dela Peña.

Ang maong lakang sa DepEd ang suportado sab ni Emano ug ngano gibutyag niini nga adunay mga youth centers ang lalawigan aron matutokan ang mga problema sa mga batan-on dili lang gugma apan lakip depresyon.