LIMA ka mga probinsya sa Northern Mindanao ang pasado sa 2019 Good Financial Housekeeping nga gipagula sa Department of the Interior and Local Government (DILG) bag-ohay lang.
Kini gilakipan sa probinsya sa Camiguin, Bukidnon, Lanao del Norte, Misamis Occidental ug ang lalawigan sa Misamis Oriental. Kung siyudad ang hisgotan naangkon sab kini sa Cagayan de Oro City; El Salvador City, Gingoog City; Iligan City; Malaybalay City, Oroquita City; Ozamiz City, Tangub City ug Valencia City.
Pasado sab ang 23 ka mga lungsod sa Misamis Oriental butang nga gikalipay kini ni Misamis Oriental Governor Bambi Emano tungod kay kung pasado niini nagpasabot lamang nga nakita sa buhatan sa DILG ang transparensya, maayo nga pagdumala ug sinsero nga pamunoan sa administrasyon.
Gipasalamatan ni Emano ang mga ulo sa departamento nga giingon niining maoy naningkamot nga masunod ang lagda sa balaod ug pagamit sa pundo sa gobyerno nga nahisubay sa insakto nga paagi, walay pagpangubo ug pagpangawkaw.
“I thank everybody for sharing the vision that we have for Misamis Oriental, not only a transparent government but an honest to goodness public service to our people,” matud ni Emano ug lakip sa gipasalamatan lakip ang mga miyembro sa Sangguniang Panlalawigan.
Malaumon sab kini nga unta dugang kadasig pa ang himoun sa iyang mga sakop aron mahimo gihapong pasado sa sunod nga katuigan.