SUPERBALITA CEBU

12 ka armas ‘gikawat’ sa pulis

CEBU.Ang gidakop mao si Police Corporal Marlito Portugueza, assistant invesigator sa Waterfront Police Station ug lumad nga taga Barangay Dumlog, Dakbayan sa Talisay. (Hulagway iya ni Arnold Bustamante)

PULIS nga sakop sa Waterfront Police Station sa Cebu City Police Office (CCPO) giunay pagdakop sa iyang kaubang pulis human gitumbok nga responsabli sa pagkawagtang sa 12 ka mga armas nga gi-surrender sa mga tag-iya niini samtang giasikaso ang lisensya.

Ang gidakop sa Integrity Monitoring and Enhancement Group (Imeg) 7 alas 3:45 sa kaadlawon niadtong Huwebes, Pebrero 27, 2020, mao si Police Corporal Marlito Portugueza, assistant investigator sa Waterfront police station, taga Deca Homes, Barangay Dumlog, Siyudad sa Talisay.

Matod ni P/Maj. Joemar Pomarejos, hepe sa Waterfront Police Station, 12 ka mga armas nga gi-surrender sa mga tag-iya niini samtang wa pa mahikay ang papel sa lisensya, nawagtang sa locker nga butanganan sa ilang mga ebidensya.

Ila kining hahibaw-an human ang usa sa mga tag-iya sa armas nibisita sa police station aron kuhaon na ang iyang gideposito nga armas.

Apan sa pagsusi sa custodian, nawagtang na kini, di lang usa, kon di 12 ka mga armas.

“Iyang gi-turn over ang iyang armas and then pag-abot sa panahon nga na-renew na, niadto siya sa station. Mao to gahapon kay iya nang kuhaon ang iyang firearm, sus, didto ang akong in-charge, wala na man. Mitulo naman ang singot kay wala naman kuno ang armas. Ingon ko, ihapa na diha, kay gikulbaan man ko basig naa pay lain nawala. So, naay 12 nga firearm ang nawa,” matod ni Pomarejos.

Tungod niini, si Pomarejos nipa-imbentaryo dayon sa mga armas nga naa sa ilang locker ug nasuta nga nawagtangan sila sa gibutangan nga vault.

Gipaimbestigar ni Pomarejos ug gipatawag ang iyang mga tawo.Nasuta nga usa sa iyang tawo ang nikuha niini pinaagi sa pamahayag sa ilang striker nga nakakita sa pagkuha sa mga armas ni Portugueza.

Gilusad dayon ang followup operation sa Waterfront Police Station inabagan sa Imeg 7 ug ilang gipatawag si Portugueza. Giingong miangkon kini sa salaod.

Si Portugueza niingon nga niadtong Enero 2020 gisugdan niya ang pagkuha sa maong mga armas.

Nakuha og balik ang unom ka mga armas nga nabaligya niini sa usa ka silbilyan sa Barangay Tinago samtang padayon pa nga gipangita ang laing unom nga expired na ang lisensya.

“Na-recover namo, Sir. Duha ang iyang na dispose and then sa unom ka firearm, ang lima didto sa taga Tinago,” dugang ni Pomarejos.

Wa moangkon

Wa na moluwat og pamahayag si Potugueza sa dihang gisuwayan sa pagkuha sa iyang habig. Apan, usa sa iyang mga abogado nga di magpahingalan nibutyag nga wa angkona ang pasangil batok kaniya.

Nasulod sa Philippine National Police (PN)P si Portugueza niadtong 2011 ug nahimong sakop sa Drug Enforcement Unit sa Waterfront Police Station.

Giingong gipahulipan kini ni Pomarejos human sa pagduda nga nalambigit sa illegal nga kalihukan ug gihimong imbestigador.

Si Police Colonel Engelbert Soriano, hepe sa kapulisan sa Siyudad sa Sugbo, nasagmuyo kang Portuguez tungod kay naningkamot sila nga malimpyohan ang hut-ong sa organisasyon, apan naa ra sa sulod ang badlongon.

“Internal cleansing tayo ng internal cleansing. Meron pala sa bakuran natin yung ganung loko-loko, very disappointing,” matod ni Soriano.

Duha ka mga kaso ang atubangon ni Portugueza.

Kini mao ang robbery ug administratiba nga mahimong ikatangtang kaniya sa serbisyo.

Nimando na usab siya nga parelibohan sa katungdanan si Portuguezae ug kasamtangan nga ibalhin kini sa personnel holding accounting unit sa CCPO. Human siya masikop, gibawian na siya sa iyang armas ug chapa.

Nunot sa hitabo, nimando gilayon si Soriano sa tanang police stations pag-imbentaryo sa tanang armas nga gi turn-over sa ilang buhatan lakip na sa mga ebedensya nga ilang nasakmit sa mga operation. (AYB)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph