Super Suroy: Miracle View 'Little Baguio' sa Ormoc

P20 RAY tubag aron ikaw makalulinghayaw sa dapit nga bugnaw ug layo sa kasamok sa siyudad.

Sa maong kantidad imo nang masuroy ang Miracle View, Barangay Milagro, dakbayan sa Ormoc nga maoy ilang entrance fee aron imong ma-experience ang katahom sa maong dapit.

Ang Miracle View nga gi-ilang “Little Baguio” nahimutang sa 14 kilometros gikan sa city proper, sa kadtong way private vehicles mahimong mag-motorsiklo, traysikol o multicab nga manukad sa City Terminal nga gibana-bana nga adunay pletehan nga P30.

Accessible ang area sa bisan unsang matang sa sakayan kay sementado ang dalan nga seguradong paspas o dali ang pagbiyahe, gawas pa luwas ang dapit kay nahimutang kini duol sa detachment sa Regional Mobile Force Battalion 8.

Sa imo pa lang pagpadulong sa Miracla View matagamtaman mo na ang kabugnaw sa klima kini gumikan kay gilibutang sa mga punoan sa kahoy.

“Bisan pa og init ngadto sa siyudad, pero diri bugnaw gyud gihapon,” asoy ni Joel usa sa nanag-iya sa maong property.

Ang 6,000 square meters nga yuta nga gihimong Miracle View, gi-award sa Department of Agrarian Reform (DAR) sa magsuong mag-uuma nga sila Joel ug Crisanto Fuentes.

Gi-unsa pagsugod?

Niadtong Agusto 2019 gibuksan ang Miracle View.

“Gamay ra gyod ni among tanom diri sa una, Marigold ra. Naka-obserbar mi nga daghan magpa-picture mao to nga amo gipalapdan,” saysay ni Joel.

Gawas sa Marigold, nadugangan ang ilang mga pananum sama sa Burlas, Gerbera, Roses ug Sun Flower.

Naglaraw ang magsuong Fuentes nga tungod sa nagkadaghang tawo nga mobisita, ilang gitukoran og upat ka cottage aron magamit niadtong buot mag-relax.

Libre ang cottage apan mamahimong I-share sa uban nga buot mopasilong.

Dunay payag sa ibabaw nga bahin diin ibayad ang entrance fee ug sa maong payag imo na malantaw ang ka-anyag tibuok lugar ug matagamtam ang presko ug bugnawng sa hangin.

Kalihokan nga mahimo

Kon ikaw nagplano moduaw mamahimong maka overnight, camping, o mahimong venue sa inyong party sama sa birthday ug uban pang gatherings, apan gikinahanglan makigsabot daan sa tag-iya.

“Naay uban nga kadlawon pa lang gani manuktok na diri sa balay kay magbayad sa entrance,” matod pa ni Crisanto nga nahinabi ning tigsuwat.

Dunay uban nga mangadlawon og duaw sa lugar aron sugaton ang pagsubang sa haring adlaw.

Gitugot sab, ilabi na niadtong magdala og pagkaon, o ba kaha painit sama sa puto ug sikwate, pwede sab maniudto ug manihapon sa area.

Unsay gidili?

Hugot nga gidili ang pagdala ug pagtagay og ilimnon nga makahubog aron paglikay sa kagubot ilabi na nga daghang mga tawo sa lugar.

Gidili ang pagpangibot og buwak apan mamahimong makapalit sa barato nga presyo.

Gidila sab ang pagtamak-tamak sa mga tanom.

Pahinumdum

Mas bintaha nga magdala og jacket, habol ug ubang panagang sa kabugnaw sa lugar ilabi na inig kagabii.

Subay lang gyod sa saktong agianan ug dugang pag-amping ilabi na kon ting uwan.

Plano sa umaabot

Nahuna-hunaan usab sa magsuong Fuentes nga magtanom og prutas sama sa mansanas ug grapes.

Giplanohan usab sa magsuon nga dugangan ang mga cottage para kung daghan ang tawo, di maghuot sa kasamtangan nga cottages.

“Sa amo diri, libre (entrance fee) ra ang bata unya bisan unsa orasa makasud ra. Ang 20 pesos unlimited na sa oras basta mosunod lang gyod ta sa patakaran,” pahinumdom ni Joel.

So, unsa pay gihuwat? Manuroy na ta uban sa pamilya, barkada, uyab ug pwde sab sa mag- inusara.

Ma-relax ka na, barato pa.