ISIP kabahin sa ilang responsibilidad sa komunidad, nihatag ang Solid Earth Development Corp. (SEDC) og luna ug niabag usab sa galastohan sa pagtukod og kahimanan sa duha ka kasikbit nga mga barangay nga nahimutangan sa minahan ug pantalan nga gipadagan niini sa lungsod sa San Fernando.
Gihatag sa SEDC ang 300 metro kwadrado nga lote ngadto sa Barangay South Poblacion nga tukoran niini og usa ka multipurpose hall diin ipahimutang niini ang session hall, mga opisina sa lehislatura, tanod ug senior citizens, ug health center.
Mitampo usab ang kompanya alang sa katukoran sa bag-ong day care center diha sa Barangay Panadtaran, P125,000 niadtong Disyembre 28, 2018, ug susamang kantidad ni’ng bag-o palang.
Gilagdaan nila ni Atty. Dennis B. Tenefrancia, presidente sa SEDC, ug South Poblacion Kapitan Dioscoro Sebra ang deed of donation alang sa maong luna sa usa ka yanong seremonya nga gipahigayon sa lote mismo nga misilbing groundbreaking sa maong proyekto ni’ng bag-o pa lang.
Napahigayon kini human gikontrata ang proyekto sa Department of Public Works and Highways (DPWH), pinaagi sa Cebu 2nd District Engineering Office, niadtong Enero 8 ngadto sa SAS General Contractors alang sa dul-an P1 milyon.
Unang natunol sa SEDC ang unang gahin alang sa katukoran sa day care center sa Barangay Panadtaran ngadto ni anhing Kapitan Ricardo “Nonoi” Reluya, sa yanong seremonyas nga gitambongan sa mga kandidata sa Miss Teen Panadtaran.
Ang manununod ni Reluya nga si Vavy Montreah Dayao, maoy midawat sa ikaduhang gahin, nga sa gihapon, uban sa nangulo sa Sangguniang Kabataan Lyca Ann Rose Selma, pipila ka mga opisyal sa barangay, ug mga magtutudlo.
Hingpit nang natukod ang Panadtaran day care center uban sa mga lamesa ug lingkoranan alang sa mga nanungha na ron’g mga bata, ug ubang kahiman sa pagpanudlo sa kabataan sa barangay. (PR)