Bag-ong plaka aduna nay QR codes

MAMAHIMO na unya nga mahibaw-an diha-diha dayon kon adunay mga kalapasan ang sakyanan o unit subay sa modernong teknolohiya nga gamiton na unya sa Land Transportation Office (LTO) 7 pinaagi sa QR Code sa plaka.

“Ang atong bag-o nga plates naa naman nay QR Code. Kanang QR code before na siya i-release sa customer naka-link nana sa data base sa sakyanan,” matod ni LTO 7 Regional Director Victor Caindec.

Matod ni Caindec nga niadtong Lunes, Pebrero 24, dihang gipaubos sa hand held device training ang mga operations team ug district heads sa LTO 6, 7, ug 8 aron mahibaw kon unsaon paggamit sa 1,200 ka device nga unang gipalit sa Central Office.

Apan wa pa mahibawo si Caindec kon pila ang ihatag alang sa Central Visayas.

“Naa namay device ang law enforcement nga mo-scan ato. Pero mogamit ka og QR code reader sa imong cellphone, magamit nimo pero ang makita nimo plate number, registered ba o dili, wala’y pangalan sa tag-iya,” pasabot ni Caindec.

Kining mga plaka mao kini ang gitawag nga “new plate” series diin nagsugod na sa letter G ang plaka ug regionalized na kini.

Mailhan usab kini nimo kay adunay QR code ang plaka sa lower right.

Usa sa feature nga mamahimong mahibaw-an dayon sa LTO gamit ang handheld device mao ang kalapasan sa sakyanan, peke ba kini o dili ug kon husto ang mga detalye sa maong sakyanan base sa plaka nga girehistro.

Subay usab niining mga plaka, padayon ang awhag sa LTO 7 sa mga nanag-iya og four-wheel vehicles nga girehistro niadtong 2015 ug 2016 nga kuhaon na kini sa SM Seaside, atol sa mall hours. (HBL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph