HEPE sa Cebu City Police Office dili motugot sa bisan unsa nga matang sa sugal lakip sa haya sa patay ug labaw na ang pag inom, bisan pa man nga daghan ang wala maka uyon niini.
Una nang mipahibawo si Police Brigadier General Albert Ignatius Ferro ang hepe sa Police Regional Office 7 nga hugot nilang ipatuman ang kampanya batok sa bisan unsa nga matang sa illegal nga sugal apil na niini ang sugal diha sa haya sa patay sa kabarangayan.
Mahimo ra nga motugot si General Ferro kung usa ka lamesa lang ang magduwa og braha ug ginagmay nga sugal alang lang sa kalingawan sa mga tawo nga nagbilar sa haya.
Apan lahi ang baruganan ni Police Colonel Engelbert Soriano, officer in charge sa Cebu City Police Office sa iyang bahin dili gyud motugot bisan usa ka lamesa nga adunay magsugal tungod kay maghatag kini og intriga ngadto sa kapulisan.
“Dito sa Cebu City we discourage kahit isang table lang, wag nalang. Kase that will create controversies saka intrigue din sa part namin eh. Di naman kailangan yan eh,” matod ni Police Colonel Engelbert Soriano.
Nakasabot ra si Soriano nga kultura na sa mga Pilipino ang mag sugal gyud atol sa ilang pag bilar sa namatyan tungod kay ang kalas niini makatabang sa gasto sa pamilya sa namatyan sama sa painit sa mga bisita nga miduaw.
Gipasabot niya nga mahimo ra nga mag bilar ang mga kaila sa namatay nga dili na kinahanglan nga mag sugal pa ang mga tawo.
Lakip sa iyang ipatuman unya ang ordinansa sa siyudad nga idili ang pag hubog-hubog tungod kay usa ni sa hinungdan nga adunay mahitabong away.
Sa pangutana kung lakip sa iyang idili ang duwa sa braha nga bisan walay sugal, matod ni Soriano nga mangutana una siya sa hepe sa PRO-7.
Mipasabot ang kapulisan sa Central Visayas nga ang pagdili sa sugal sa mga haya sa patay pinasikad sa balaod nga Presidential Decree 1602.
Ipasusi nila karon ang mga haya diha sa mga barangay nga mi sobra na sa siyam ka adlaw nga wala pa gipalubong tungod sa pagduda nga gituyo kini aron lang motaas ang adlaw sa pagpanugal sa mga sugarol.
Sukad mimando si Ferro sa iyang mga sakop nga hingusgan ang kampanya batok sa illegal nga sugal daghan na ang nangadakpan niini ug napasakaan sa kaso.
Sunod semana gitakdang ipahibawo sa PRO-7 kung pila na ang nangadakpan sugod niadtong adlaw nga mideklarar si Ferro sa no take policy gikan sa illegal nga sugal ug illegal nga drugas. (AYB)