SUPERBALITA CEBU

CCTV sa snatcher nga nakapatay nakuha sa MCPO

ADUNA nay person of interest kadtong snatchers sakay og motorsiklo nga milabni sa bag niadtong dalaga nga nag-angkas sa laing motorsiklo nga natagak og miresulta sa kamatayon niini.

Ang pagpanglabni nahitabo sa Mantawi Drive, North Reclamation Area, Mandaue City niadtong Pebrero 22 sa gabii.

PCapt. Marvin Fegarido, hepe sa Subangdaku Police Station miingon nga padayun gihapon sila sa pag imbestigar sa maong insidente ug aduna na silay person of interest apan wala pa kini nila nganli.

Nakakuha na ang mga kapulisan og mga CCTV footage sa mga kasikbit nga establishemento sa maong lugar apan dili pa kaayo nila maklaro.

“Nangita pa mi og additional CCTV aron mahibaw-an kung ang among gisundan nga lead mao ba gyud to siya,” sigun ni Fegarido.

Sa maong insidente, patay si Jeniffer Vallespin, kinsa miangkas sa motorsiklo niadtong higayona sa dihang ang iyang bag gilabni sa mga suspek nga miresulta sa iyang pagkaguroy ug naparok ang ulo sa sementadong kalsada.

Namatay si Vallespin duha ka adlaw human ang maong insidente.

Nahinabi sa Superbalita Cebu si Janine Dequita, usa sa mga biktima ug maoy drayber sa gisakyang motorsiklo ni Vallespin, nga gikan sila nanihapon ug nagkaraoke niadtong higayona.

Nagkatapok-tapok ang managhigala human nga taod taod na silang wa magkita.

Ihatod unta nila si Vallespin sa Parkmall PUJ terminal aron pasakyon og jeep pauli sa Lapu-Lapu City sa dihang nahitabo ang pagpanglabni.

Si Vallespin ug laing angkas ingon man ang drayber nga si Dequita ang naguroy sa dihang gilabnot ang bag ni Vallespin nga naglingkod sa pinakaluyo nga bahin sa motorsiklo.

Nanawagan si Dequita niadtong mga nakasaksi nga mohatag og detalye aron mas dali nga mailhan ang mga suspetsado ug mahatagan og hustisya ang kamatayon sa iyang higala.

Kasamtangang, gihaya si Vallespin sa ilang balay sa Soong, Lapu-Lapu City. (KFD)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph