NASUBAY na sa Department of Health (DOH) 7 ang 26 ka mga Korean nationals nga gikan sa Daegu City, North Gyeongsang Province, South Korea nga miabot sa Sugbo gabii sa Pebrero 25, 2020.
Kini maoy gibutyag ni Dr. Jaime Bernadas, pangulo sa Department of Health (DOH) 7.
Matod ni Bernadas, ang mga turista anaa naka-check in sa hotels sa dakbayan sa Lapu-Lapu ug Sugbo.
“Identified na na ang 26 ka buok ang Cebu ug Lapu-Lapu ongoing na ang atong pagplastar sa ila, asa sila ibutang naghulat pa ko og final report sa atong health offices,” asoy ni Bernadas.
Ang 14 niini anaa sa dakbayan sa Sugbo ug ang 12 anaa sa Lapu-Lapu City.
Tungod kay nahimutang naman sila sa mga hotel, gihangyo na nila ang mga hotels kon mamahimo ba nga ang rooms nga giabangan niini maoy mahimong quarantine area, matod ni Bernadas.
Apan wala pay nadawat ang DOH nga approval gikan sa mga hotels.
Ang mga turista gipaubos na isip mga Persons Under Monitoring (PUM), kay gikan man sila sa lugar nga aduna nay kaso sa coronavirus disease (Covid-19).
Magpadayon ang monitoring sa DOH ug Bureau of Quarantine (BOQ) bisan nga anaa sa hotels ang maong langyaw.
Dugang ni Bernadas nga sa higayon nga dili motugot ang mga hotel sa ilang hangyo dad-on ang maong Koreans ngadto sa quarantine facility sa duha ka mga naasoyng siyudad.
Atol sa pagkutlo niining balita kasamtangang walay usa kanila ang mipakita og simtomas sa Covid-19.
Sa higayon nga nagpakita og sintomas sa Covid-19 ang naasong mga langyaw, mahimo na silang Persons Under Investigation (PUI) ug i-admit kini diretso sa tambalanan.
Si Gobernador Gwendolyn Garcia nagkanayon nga ang mga pasahero nga mga Pinoy o katong permanent resident visa holder nga gikan sa nahisgutang probinsya nga moabot sa Sugbo mao lang una ang ipaubos sa mandatory quarantine sulod sa 14 ka adlaw.
Kini tungod ang travel ban, gi-limit pa man sa maong lugar.
Susamang protocol usab ang subayon sa quarantine period ubos executive order nga giluwatan ni Garcia.
Samtang ang mga pasahero nga dili molupyo sa Sugbo papaulion sa ilang lugar ug didto ipaubos sa quarantine.
Gitataw ni Garcia nga ang ilang ipatuman nga sistema diri sa Sugbo mag agad sa desisyon sa Inter-Agency Task Force on Emerging Infectious Disease (IAFT-EID).
Sa laing bahin, nitiyabaw na ang pipila ka mga motorbanca operators sa Barangay Punta Engaño, dakbayan sa Lapu-Lapu gumikan sa menos nga tourist arrival sa dakbayan gumikan sa hulga sa Coronavirus disease Covid-19.
Nunot niini ang kagamhanan sa dakbayan ming apod-apod gilayon ug mga bugas ug groceries sa moabot 221 ka mga motorbanca operators sa Punta Engaño aron makatabang sa ilang inadlaw-adlawng panginahanglan.
Sunod nga tagaan sa kagamhanan mao na usab ang mga apektadong molopyo sa Maribago ug isla sa Olango.
Matod ni Lapu-Lapu City Mayor Junard “Ahong” Chan nga nakadawat siya ug reklamo gikan sa mga motorbanca operators nga minos na gayud ang nag island hopping sa dakbayan sukad nga gipatuman ang pag-ban sa mga Chinese national sa pagsulod sa nasod.
Ning bag-ohay lang gipatuman na usab ang pag ban sa mga Korean nationals hinungdan nga mas moubos pa usab unya ang mag island hopping, nasayran nga ang Koreans maoy numero unong turista sa dakbayan.
Iya na usab gimandoan ang City Social Welfare and Development CSWD sa pagpahigayon ug food for work programs sa mga motorbanca operators aron duna silay alternatibong mga panginabuhian sama sa pagluto ug pagpaninda og pagkaon ug uban pa.
Awhag niya sa mga apektadong lumolupyo nga dili mawagtangan og paglaom sanglit mobalik ra unya sa normal ang ilang panginabuhian sa higayon nga mawala ang hulga sa Covid-19.
“Moubos ang atong turismo apektado gyud ang nag negosyo so mao na ang ato gi-process sa pagkakaron para naay makaon pud atong mga kaigsuonan kay ang Koreans mao gyud ang pinakadaghan diri,” dugang pa sa mayor. (ANV, GCM)