SUPERBALITA CEBU

Peter Lim, Espinosa, kaubanan gikiha sa NBI

ANG National Bureau of Investigation (NBI) nipasaka og bag-ong mga kasong drug-related batok kang self-confessed drug lord Rolan “Kerwin” Espinosa ug Sugboanong negusyante Peter Go Lim niadtong Pebrero 25, 2020, usa ka tuig kapin human sila pasakai og kasong conspiracy to commit illegal drug trading.

Ning higayuna, sila si Espinosa, Lim ug laing lima gipasakaan og kasong pagbaligya ug pag-deliver og drugas ug/ controlled precursors ug essential chemicals nga gigamit sa drug syndicates ug financiers sa transactions nga naglambigit sa illegal trafficking sa drugas.

Gawas kang Espinosa ug Lim, laing gikiha sa Department of Justice (DOJ) mao sila si Peter Co (nailhan usab nga sila si Wu Tuan Yuan), Lovely Impal, Melvin Gerpacio, Ryan Diaz, ug Reynaldo Diaz alyas Jumbo.

Giakusahan silang namaligya og illegal drugs sa lima ka mga barangay sa sa Cebu City gikan sa 2008 ngadto sa 2011.

Sa iyang kiha, ang NBI niingon nga si Espinosa nagsugod sa iyang illegal drugs trade sa Cebu City sa 2008, samtang siya gibilanggo sa kanhi Bagong Buhay Rehabilitation Center (Cebu City Jail) sa kasong illegal drugs sa Cebu Regional Trial Court Branch 13.

Ni-transact sila pinaagi sa cellphones samtang ang bayad gipaagi sa banko ug electronic money transfer.

Si Gerpacio nagsilbeng bagman ni Espinosa ug in charge sa transactions sa Barangays Pasil, Ermita, Carreta, Tejero ug Lorega-San Miguel sa siyudad sa Sugbo.

Si Reynaldo Diaz nangangkon nga sa dihang kusog ang ilang drug trade sa Cebu City gikan sa 2010 ngadto sa 2011, ang grupo nakabaligya og lima ngadto sa 10 kilos sa shabu matag buwan.

Ang NBI nitumbok sa pagkumpisal ni Espinosa sa Senate inquiry sa Disyembre 2016 nga ang iyang supply sa shabu gikan kang Jeffrey “Jaguar” Diaz ug gitugyan kaniya gikan nila ni Ryan, Reynaldo ug Impal, ug uban pa.

Si Espinosa gibilanggo sa NBI detention center samtang si Co sa the New Bilibid Prison.

Si Impal nabilanggo sa Iligan City Jail samtang si Gerpacio sa Cavite Provincial Jail.

Si Lim wa pa mahibaw-i kon hain. Si Jaguar napatay sa Las Piñas niadtong 2016 samtang si Reynaldo Diaz nadakpan sa Bicol niadtong 2016 ug gipaubos sa witness protection program.

Si Ryan Diaz wa pa madakpi.

Ambot hain

Si Police Colonel Engelbert Soriano, officer-in-charge sa Cebu City Police Office, nibutyag nga wa sila masayod kon hain si Lim.

“Wala akong information regarding sa whereabouts nya o anong status nya. The City police, ang stand namin is we will just monitor kung anong possible activities nya sa area,” matod ni Soriano.

Agosto 20, 2018, pakyas ang kapulisan sa Central Visayas pagdakop kang Lim sa dihang gi serve ang warrant of arrest nga giisyu sa korte sa dakbayan sa Makati.

Ang Criminal Investigation and Detection Group (CIDG) 7 nipadala usab og subpoena sa iyang balay sa Barangay Kasambagan ug Banilad sa Dakbayan sa Sugbo, apan pakyas tungod kay ang iyang mga gwardya ug katabang lang ang miatubang kanila.

Sukad nilingkod sa katungdanan si Presidente Rodrigo Duterte niadtong 2016, nalakip ang ngalan ni Lim sa mga listahan nga usa sa labing dako nga supplier sa shabu sa tibuok nasud.

Hulyo 16, 2016, nakigkita si Lim kang Duterte sa dakbayan sa Davao aron limpyohan ang iyang pangalan.

Hugot nga gihimakak sa Sugboanong negosyante nga nalambigit siya sa illegal nga drugas. (AYB, SunStar Philippines)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph