SUPERBALITA CEBU

Mavs wa mahudlat sa Spurs

WA MAGPATAROG ang Dallas Mavericks sa grabing hudlat nga ilang nasinati sa ikaupat nga quarter nga hapit makaguba sa duwa nga ilang gidominar gikan sa sinugdanan.

Ang presensiya nila ni Luca Doncic ug Kristaps Porzingis sa opensa maoy nakapapas sa tensiyon.

Si Doncic mipuga og 26 puntos, 14 ka assists ug 10 ka rebounds samtang midugang si Porzingis ug 28 puntos ug 12 ka rebounds aron ituboy ang Mavs ngadto sa 109-103 nga kadaugan batok sa San Antonio Spurs kagahapon.

Kini maoy ika-13 nga triple-double performance ni Doncic ning nagpadayon nga season, ug ika-21 sa iyang career diin iyang natupngan ang franchise record ni Jason Kidd.

Sa dihang gitug-anan kalabot sa iyang record nga nakulit nianang gabhion, wa manumbaling si Doncic niini ug mas gikalipay pa niya ang kadaugan nga niagi og dakong hudlat. Iya usab nga gihangop ang pagkaputol sa upat ka sunodsunod nilang kapildihan sa San Antonio.

“It’s tough to play here,” matod ni Doncic. “You can see we’re learning. It’s not always going to be perfect, but we’re learning.”

Sa kadaugan, ang Dallas nagpabilin sa ikapitong puwesto sa Western Conference standings nga may 36-23 nga baraha samtang ang Spurs nahagsa sa ika-12 nga luna (24-33). Nangulo sa Spurs si DeMar DeRozan nga may 27 puntos, siyam ka assists ug walo ka rebounds.

Samtang sa laing duwa, mipabaha og 33 ug 12 ka rebounds si Jayson Tatum sa dihang giduot sa Boston Celtics ang Utah Jazz ngadto sa ikaupat nga sunodsunod nga kapildihan, 114-103.

Midugang og 20 si Jaylen Brown, 17 ang natampo ni Marcus Smart alang sa Boston.

Ang kadaugan maoy nagbaliwala sa 37 puntos nga nalugit ni Donovan Mitchel sa Jazz.

Human sa ilang ginabsanay, ang Celtics mibuak sa 82-82 nga panagtabla pinaagi sa tres ni Gordon Hayward sa katapusang minuto sa third quarter.

Ang tulo ka outside shots ni Smart ug laing tulo ka baskets ni Enes Kanter maoy nakapainat sa labaw sa Boston, 100-87, 7:22 ang nahabilin sa fourth quarter ug wala na kini mohatag og gamayng kahigayonan nga makaarangkada pa ang Jazz. (JBM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph