MOHUNONG una sa makadiyot ang AboitizLand Football Cup karong Sabado ug Dominggo. Kini aron paghatag sa Central Visayas Football Association nga makapahigayon sa tinuig nga Sinulog Cup.
Ang torneyo nga anaa na sa ikanapulo ka tuig, gikatakda ra unta niadtong milabayng duha na ka semana, apan nauswag kini tungod sa pagsiaw ug kahadlok sa Coronavirus.
Ugmang adlawa, Sabado, moabot ngadto sa siyam ka kategorya ang duwaon diha sa Cebu City Sports Center ug sa San Roque Parish football field, samtang sa Marso 1, lima ka division ang ipahigayon sa CCSC.
Sa Dominggo, ang Men's Open, 40-Above, Inter-Company, Ladies Open ug 50-Above duwaon sa CCSC.
Karong tuiga, moabot ngadto sa 220 ka mga teams, lakip niini ang pipila ka entries sa gikan sa laing isla, ang kompirmadong mosalmot.
Ang U7 langkuban sa 12 ka mga teams, lakip na ang gikan sa Masbate, samtang ang U9 ug U11 divisions aduna usay 28 ka entries - usa niini sa Davao City, laing usa sa Panabo City ug unom sa Don Bosco Technology.
Napulo ang magtigi sa 40-above division samtang ang Inter-Company langkuban sa walo ka teams. Ang Ladies open mitali og 15 ka teams ug lima ang sa 50-above.
Ang men’s open maoy adunay pinakadaghang entries diin moabot ngadto sa 30 ka teams nga gibahin sa unom ka grupo ang mopakita og aksiyon. (PR)