GIPANGHIMAKAK ni Sean Gibbons, presidente sa MP Promotions, nga nakig-ayuda siya ni Bob Arum sa Top Rank aron mapahigayon ang away ni Manny Pacquiao ug Terence Crawford.
Matod ni Gibbons nga wa siya masayod kon kinsa ang gikasabot ni Bob Arum ug kon duna man gani dili usab kini maong mga tawhana ang angayan niyang sabuton.
Sa taho sa Boxingnews24.com, gitug-an ni Arum ngadto sa TalkBox sa podcast nga iya nang giplanohan ang away ni Pacquiao, ang kasamtangang WBA “super” welterweight champion, ug Crawford, kinsa mao ang naghupot sa WBO title.
“We’re working on Terence’s fight in June [or] at the beginning of July. There are a couple of options for Terence,” ingon ni Arum ngadto sa TalkBox sa podcast. “We’re exploring a Pacquiao fight, and if that can’t happen, we’re exploring a fight against Kell Brook.”
Kon kahinumdoman, taodtaod nang nagkabuwag na ang partnership nila ni Arum ug Pacquiao, ug gani ang uwahing duha ka away sa fighting senator - batok ni Adrien Broner ug Keith Thurman sa niaging tuig - gi-promote sa Premier Boxing Champions (PBC) ang kaatbang sa Top Rank ni Arum.
Ang PBC aduna usab ubang mga kalidad nga mga fighters ubos sa ilang promotions nga posibling makontra ni Pacquiao. Kini sama kanila ni Danny Garcia, Shawn Porter ug unified WBC ug IBC champion Errol Spence Jr.
Sa niaging Disyembre, si Crawford malampuson nga midepensa sa iyang titulo pinaagi sa pagpaundang sa Lithuanian nga si Egidijus Kavaliauskas.
Mga boxing aficionados naka-obserbar usab nga bisan tuod og undefeated si Crawford sulod sa 36 ka away, 27 niini gipang-knockout, apan dili mga inila ug way mga dagkong pangalan ang sagad nakontra niini.
Si Pacquiao, sa iyang bahin, wala na usab makapakita og aksiyon sukad iyang napildi pinaagi sa desisyon si Thurman niadtong Hulyo sa niaging tuig.
Matod ni Gibbons nga labing siguro mao nga si Pacquiao moaway karong Hunyo o Hulyo.
Ning bag-o lang, si Pacquiao mipirma og kontrata sa Paradigm Sport Management, usa ka US-based sports agency nga mao usab ang naghupot ni UFC star Conor McGregor. (JBM)