GIHUGTAN na sa Philippine National Police (PNP) Regional Office 7 ang kampanya batok sa iligal nga sugal. Dili lamang ang mga masiao ang dakpon kon dili apil ang mga magsugal panahon sa pagbilar og patay. Tinuod nga daghan ang mag-mahjong, magduwa og baraha ug ubang klase sa sugal panahon sa bilar kay mao kini ang kalingawan sa mga magbilar aron dili sila makatulog. Apan sumala sa kapulisan nga tugotan nila basta tag-usa lang kuno matag duwa. Apan kon magpusta-anay sugal man gihapon kini. Dili sayon alang sa kapulisan pagbantay kon gituman ba kining mao nilang lagda kay magbuntag baya kining haya. Mahimo usab nga magsugal sa sud sa balay nga dili makita sa gawas.
Ang mahinungdanon mao ang pagukod aron mahunong gayud kining masiao ug tigbakay. Hinaut pang tinu-oron na sa kapulisan ang ilang kampanya batok sa illegal gambling kay anaa nay hulga ni PNP chief Archie Gamboa nga iyang relibuhan ang mga regional director kon mahibaw-an nga magpadayon ang iligal nga sugal sa ilang hurisdiksiyon. Ang kadaghanang buhaton sa mga pulis nga nagdawatan og payola sa mga gambling lords mao ang pagpahunong lang usa sa ilang pagpasugal mintras init pa ang kasugoan sa ilang labaw. Pabalikon lang kini inig-abut sa hustong panahon. Pero atong hatagan og higayon ang PNP tingalig mahunong na tuod kining illegal gambling.
•••
Mopahuway na si Naga City, Cebu Mayor Valdemar Chiong sugod sunod buwan. Mao kini ang unod sa iyang resignation letter nga iyang gipadala ngadto kang Gob. Gwendolyn Garcia niadtong Pebrero 24, 2020. Si Mayor Chiong nasuspenso og 90 diyas kalabut sa graft case nga gipasaka batok kaniya niadtong 2014.
Kon mo-epekto na ang iyang resignation sa Marso 16, mopuli kaniya mao ang iyang bise mayor nga iya ra usab nga anak, kanhi mayor Kristine Chiong samtang ang mahimong bise mayor mao ang napiling numero unong konsehal nga si Virgilio, iyang maguwang. Nakalitan ang katawhan niining desisyon ni Mayor Chiong kay iyang mang gipangayo kining maong posisyon inay nga magpapili pag-usab si Mayor Kristine. Unsa gyud kaha ang tinuod nga katarungan nganong mi-resign si Mayor Chiong?
•••
Gidawat ni Presidente Rodrigo Duterte ang pagpangayo og pasaylo sa Chairman ug Chief Executive Officer sa ABS-CBN tungod sa wala nila pag-ere sa political ads niya. Gawas niini misaad usab siya nga dili manghilabut sa kongreso sa diskusyon niini kalabut sa gipangayo nga renewal/extension sa franchise sa maong broadcast network. Misaad siya nga kon mahibaw-an nga maghilabut siya sa kongreso, mo-resign siya. Sa dihang gipangutana kon iya bang pirmahan ang balaud nga maglugway sa franchise sa ABS-CBN ug dili niya i-veto, wala moklaro ang Presidente kon unsa ang iyang mahimong aksiyon gawas sa pag-ingon nga iya kining desidihan inig-abut sa maong panahun. Human niining baruganan ni Presidente Duterte, hinaut pang ato nang hunongon kining debate pabor ug batok sa ABS-CBN. (mannyrabacal1144@gmail.com)