SUPERBALITA CEBU

Barrita: Gubat batok sa sugal

Tikdul-tikdol

TULO ka pari nadakpan nga nagtong-its. Gidala sila sa korte. Sa dihang nahibawo ang huwes nga mga pari ang dinakpan, iya kining giingnan, “Tagai kuno ko ninyo og maayong katarungan aron i-dismiss nako ang kasong illegal gambling batok ninyo.”

Ang usa ka pari niingon, “Di man to sugal judge. Lingaw-lingaw ra man to. Pawagtang sa kalaay. Wa may kwartahay.” Matod pa sa huwes, “Kon way pusta, way sugal.” Busa iyang gipapauli ang maong pari.

Ang ikaduhang pari niingon nga wa pa gani siya makahikap sa baraha. Gipapauli usab siya sa huwes. Ang ikatulong pari nga mao na lay nahibilin niingon, “Unsaon man nako pagtong-its judge nga ako na man lang usa ang nahibilin?”

•••

Gideklarar sa Police Regional Office (PRO) 7 ang gubat batok sa tanang matang sugal dinhi sa Central Visayas bisan sa nanagbilar sa mga haya sa minatay. Ubos kini sa mando ni Police Brigadier General Albert Ignatius Ferro, hepe sa PRO 7.

Apan lagi kay nahimo na man nga kabahin sa kultura ang pagsugal sa mga nagbilar sa haya, si Ferro niingon nga iyang gitugotan ang usa lang ka gambling table. Ang nagsugal sa ikaduha ug mosunod nga mga lamesa pagasikupon.

Pero kasagaran, pawagtang ra sa duka ang sugal sa mga haya. Sa haya ra ba, di lang kay tong-its ug majong ang sugal. Ang mga tawo nga naungo sa swertres, molili na sa numero sa lungon kay pustahan.

•••

Naghuot na ang prisohan sa Cebu City Police Office (CCPO) tungod sa gubat kontra sa sugal. Si Police Colonel Engelbert Soriano, officer-in-charge sa CCPO, niingon nga niabot nag 254 ka mga tawo ang nadakpan sa 181 ka anti-illegal gambling operations.

Apan nireklamo ang kompanya nga nagpadagan sa Peryahan ng Bayan nga naapil sa dakop sa kapulisan. Matod nila aduna silay court order nga maka-operate nga legal sa Central Visayas.

Ang gubat kontra sa sugal mando gikan ni Police General Archie Gamboa, Philippine National Police (PNP) director. Ang police regional director nga di makapahunong sa sugal relibohan. Busa ayaw mog ingon nga di mawagtang ang sugal, pustahanay pa.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph