NANAWAGAN karon si Senador Richard Gordon nga himoan na og Implementing Rules and Regulation (IRR) aron na mapatuman ang balaod nga iyang gipangamahanan, ang Motorcyle Crime Prevention Law o Republic Act 11235. Tumong sa maong balaod nga padak-an ang mga plate numbers sa mga motorsiklo. Kini nunot sa padayon nga pagpamatay sa mga riding in tandem. Niadto pang miaging tuig napasar kining maong balaod sa Kongreso ug napirmahan ni Presidente Rodrigo Duterte. Apan wa lang ma-implementar gumikan kay ang Presidente mismo maoy nagmando nga ipahunong una gumikan sa daghang reklamo.
Wala pa usab makahimo og IRR ang Land Transportation Office (LTO). Ang IRR mao kana ang detalyadong probisyon sa usa ka balaod nga maoy basihan sa pag-implementar. Kon walay IRR dili pa ma-implementar ang usa ka balaod.
Unsa man ang tumong ning maong balaod? Kasagaran god sa mga pagpamatay karon labi pa kining gidudahan nga extra judicial killings binuhatan sa riding in tandem. Kana bang mag-motor nga mag-angkas ug magtaptap sa nawong nga mopusil sa ilang mga biktima. Dili god mailhan kay gawas nga nagtaptap, gamay ang plaka sa motorsiklo nga dili dayon makita sa mga saksi.
Nagmando ang balaod nga padak-an ang plaka, ang mga letra ug numero nga makita bisan sa mga 15 metros ang gilay-on. Ibutang kini atubangan ug likod. Ang rason sa mga misupak labi pa ang mga motorcycle riders’ group kay dilikado nga mapalid sa hangin ug adunay madisgrasya kay hait ang kilid sa plate number. Gawas pa, hasol na kuno ug makadaot sa desinyo sa motorsiklo.
Makatabang ba gyud kini sa pagsulbad sa krimen? Deterrent o makapakgang ba kini sa pagsumpo sa kriminalidad? Bisan og dako pa sa nigo ang plate number sa motor kon walay mosaksi, di gihapon masulbad ang krimen. Sa atong husgado, kon way saksi, way krimen. Bisan kon maklaro ang plate number sa motor unya kinawat diay to, mosaler kaha gihapon ang kaso? Hinuon, makatabang sa ubang aspeto labi pa kon makuha sa CCTV apan di ni maoy lig-on nga solusyon sa usa ka krimen. (bobbygnalzaro@gmail.com)