GI-BAN na sab ang biyahe gikan sa Pilipinas padung sa nasud South Korea gumikan sa coronavirus disease 2019 (Covid-19).
Sa report, anaa na sa 1,261 ang natala nga kaso sa COVID-19 sa South Korea nga gituohang modaghan pa, apan gobyerno sa maong dapit naningkamot nga di na kini motakod-takod.
Kung moingon kita’g gi-ban buot pasabot, dili na kasulod sa Pilipinas ang mga biyahe gikan sa South Korea, pero dunay giingong nagmagahi nga mga airline companies nga padayon gihapong mipasakay og mga Korean nationals sa nasud.
Nasayran nga dunay direct flight gikan South Korea ang Manila, Clark, Kalibo sa Aklan, Mactan-Cebu ug sa Panglao Island sa Bohol.
Perte gani nga paningkamot sa kagamhanan sa Pilipinas nga di gyud kasulod ang Covid-19, apan kining pipila ka mga airline companies wa gyud mituman, diha na seguro sila motuman og masayran na sila.
Apan, sumala sa Bureau of Immigration (BI) ug sa Civil Aviation Authority of the Philippines (CAAP) nga puwede gihapon nga dunay motugpa nga mga eroplano gikan sa maong nasud apan mag-depende kini sa mandu sa Department of Health (DoH) sama sa usa ka special trip.
Sa maong special flight sakay niini ang mga Pinoy nga duna nay mga ticket nga na-cancel subay sa pagdeklara og ban, apan did-an gayod ang mga Korean nationals.
Susihon unta gayod kini sa CAAP ug BI nga taho, gumikan kawang lamang ang paningkamot sa Pilipinas sa pagbatok sa Covid-19.
Mag-amping ug mas maayong di una mobiyahe sa gawas sa nasud, luyo niining epidemya karon nga mikatag na sa tibuok kalibutan.