ANG Ateneo de Davao University napildi sa Elite Star Division title (12 years old and below) ngadto sa Ford Academy of the Arts (FAA) apan nakuha gihapon nila ang Davao Pride Basketball League (DPBL) Season 3 Rising Division crown diin laing tulo ka tims miguwang kampeyon human giyabo ang tagsatagsa ka kaatbang sa best-of-three championship games sa Rizal Memorial Colleges (RMC) Petro Gazz Arena.
Ang Ateneo de Davao University (Addu) Blue Knights miyukbo sa FAA, 46-57, sa Game 2 human maangkon ang 48-50 nga kapildihan sa una nilang Elite Division finals encounter.
Ang taga Ford nga si Kenneydy Amper maoy most valuable player (MVP).
Suma ni Ateneo coach Harry Hipolito nga nanguna sila sa halftime.
“Hindi na-sustain ang lead dahil natalo kami sa hustle and rebounding. Mas maraming opportunities to score ang kalaban and kami limited opportunities and hindi pa namin na convert.”
Apan mibawos ang Ateneo sa Rising Division (11-below) gipildi ang San Pedro College (SPC), 50-37, sa ikaduha nilang bugno taliwala sa paningkamot ni MVP Abram Kyle Amaneo nga mikamada og 16 points puntos.
Dugang ni Hipolito nga mipatuman sila og lig-ong depensa kontra SPC.
“Na-contain namin mga scorers nila kaya medyo comfortable ang lead namin buong game. “
Ang Blue Knights mipildi sab sa SPC, 52-42, sa Game 1.
Ang Rising champion team gibanderahan nila Julian Joaquin Garcia, Jalf Pitulan, Astin Parker Sañano, Rowe Isaac Tavita, Mark Julius Magnaye, Theodore Emmanuel Zamora, Andrew Dexter Castro, Gabriel Manzano, Wayne Cabanalan, Brent Carlo Marcoso ug Al-Jabir Khail Hernandez.
Samtang si MVP Jose Lumanag miaswat sa Holy Child College of Davao (HCCD) Red Eagles’ Rock Star Division championship nga kadaugan kontra Lamb of God Sped Academy (LGSA), 70-66, sa Game 2.
Ang Philippine Women’s College of Davao (PWC), sa ilang bahin, milansang sa Aspirants Division title pinaagi sa pagpildisa Malayan Colleges Mindanao (MCM), 77-73, uban si MVP Romeo Langa nga mibubo og 18 puntos samtang ang Jose Maria College (JMC) Kings mipahilum sa RMC Bulldogs, 77-73, aron makuha ang Competitors Division championship trophy uban si MVP James Payosing nga miiskor og 16.