GIPASIDUNGGAN sa Davao City Police Office (DCPO) ang 26 ka mga stakeholders niini atol sa 29th Philippine National Police (PNP) Founding Anniversary Huwebes, Pebrero 26, sa Camp Capt. Domingo E Leonor headquarters, Davao City.
Si DCPO spokesperson Police Captain Rose Aguilar nagbutyag nga usa kini ka pagpasalamat ngadto sa ilang mga stakeholders diin maoy ilang kauban sa pagpatunhay sa kahapsay ug kalinaw diha sa komunidad.
“Mokabat sa 26 ka mga stakeholders nato ang atong gipasidunggan gumikan sila ang atong nahimong partner,” sulti ni Aguilar sa Superbalita Davao.
Mga stakeholders gikan kini sa business sector, private sector, ug bisan sa mga barangay kapitan nga maoy nahimong dakong kabahin sa mga kampanya sa kapulisan.
Usa sa gibasehan sa DCPO sa paghatag og pasidunggog mao ang kontribusyon niini sa pagpuhag sa nagapayuhot og gidili nga droga ingon man ang pagtabang sa pagpalambo sa sosyodad nga maoy usa sa mga resulta sa gipakusgang kampanya batok kriminalidad sa pulisya.
Mapasalamaton sab si DCPO director Colonel Kirby John Kraft sa mga stakeholders nga walay-puas sa pagtabang ngadto kanila. (Jeepy P. Compio)