SUPERBALITA DAVAO

Babaye gipadpad sa hangin gilamayan

DAVAO DEL SUR. Nagbangotan ang pamilya sa 24-anyos nga si Kristelle Ann Abapo sa Barangay Kapatagan, Digos City, human namatay dihang gilupad sa kusog nga hangin sakay sa motorsiklo niadtong Sabado, Pebrero 22. (Hulagway ni Orlando B. Dinoy) hangin sakay sa motorsiklo niadtong Sabado, Pebrero 22. (Hulagway ni Orlando B. Dinoy)

DIGOS CITY -- Nagbangutan karon ang pamilya ug kaparyentihan sa usa ka babayeng namatay human gilupad sa kusog nga hangin nga gituhoang ipu-ipo samtang nagsakay og motorsiklo niadtong Sabado sa buntag, Pebrero 22.

Giila ang biktima nga mao si Kristelle Ann Abapo, 24, molupyo sa Barangay Kapatagan ning dakbayan.

Gibutyag sa mga nakasaksi nga hinay lamang ang dagan sa motorsiklo apan paghidangat sa Barangay Cogon, kalit nga mihapak ang kusog nga hangin hinungdan nga nahakwat ang biktima gikan sa giangkasan nga motorsiklo ug gilupad pataas hinungdan nga nasangit pa kini sa kable sa Telcos o Cable System una nahug sa kapin kulang mga diyes-metros nga gilawmong pangpang.

Hinuon, luwas ang drayber sa motor nga si Froilan Ladio apan naglisud kini sa paglakaw hangtud sa pagsuwat ning balita Huwebes tungod sa nahiagumang mga pangos ug bun-og sa nagkadaiyang bahin sa lawas dihang natumba ug nabagnos ang gimanehong motor.

Dako ang pasalamat sa drayber nga way kuryente ang linya sa cable system kay nilambod kini sa manobela sa motorsiklo.

Samtang di sab makatuo ang bana ni Kristelle nga si Felkim sa nahitabo.

Gitataw sa bana nga moadto unta sila sa iyang asawa sa bukid apan nananghid kini nga mokuha una og jacket.

Wa magdahom si Felkim nga molahos diay ang asawa sa Barangay Tres de Mayo aron kuhaon ang love birds nga i-surprisa unta niini sa 5-anyos nilang anak.

Giabisohan na sa City Disaster Risk Reduction Management Office-Digos ang mga motorista nga mag-amping sa pagmaneho ilabi na kung kusog ang hangin aron malikay sa disgrasya.

Samtang sumala ni Pagasa-Davao chief meteorological officer Lolita Vinalay, posibleng “gusty winds” hatud sa localized thunderstorm nga nasinati sa bahin sa Digos City niadtong Sabado. (Orlando B. Dinoy)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph