GIHINGUSGAN karon sa Police Regional Office (PRO) 7 ang kampanya batok sa illegal nga sugal. Tungod ini, naghuot na ang prisohan sa Cebu City Police Office (CCPO) sa mga piniriso nga nadakpan sa illegal nga sugal.
Bisan ang sugal sa mga haya sa patay higpit nang idili sa Dakbayan sa Sugbo. Okay ra unta tong usa ka lamesa sa Rehiyon 7, sumala sa PRO 7. Apan sa Dakbayan sa Sugbo, bisan usa way itugot ni Police Col. Engelbert Soriano.
Kini bayang sugal tipik na ni sa kultura ug nabatasan na nga kon dunay haya, duna ini kay maoy kalingawan sa nagbilar. Dukaon baya ang tawo nga magtukaw kon way kalingawan.
Sa kadaghan sa illegal nga sugal, nganong ilakip man ang sa haya? Maayo tingali di istriktuhon ang sugal sa mga haya kay wa man kini magmugna og mga problema. Di sama sa ubang sugal sama sa suertres, masiao ug illegal gambling machines nga dunay dautang mga epekto.
Tinuod, dunay mga mapahimudsanon sa panahon. Sama sa mga estorya nga naay mangabang og patay aron pasugalan. Apan sayon ra man kini nga susihon pinaagi sa mga dokumento sa patay, kon kabanay ba ang gihaya o di. Nahibawo usab ani ang barangay.
Una pa gukdon sa kapulisan kining mga sugal sa mga haya, mas maayong ilang unahon ang paggukod sa illegal nga sugal, sama sa suertres ug uban pa. Iapil ang usab ang illegal gambling machines nga sud na sa pipila ka katuigan, nahilom ang kampanya.
Mao ni ang angay nga hugtan og gukod sa kapulisan kay daghan niini naghinayhinay og kutkot sa mga pamilya, kinsang mga sakop nangaungo sa illegal nga sugal. Dunay uban mangawat o mamaligya og ilang mga butang aron makapanugal kay na-addict na.
Nganong hilabtan pa man ning sugal sa mga haya nga sud na sa dugay nga panahon, maoy paagi sa paglingawlingaw sa mga nagbilar? Unahon unta paggukod ang gatasan sa kurakot nga mga pulis.