UBAY-UBAY nga mga kontrabando ang nasakmit dihang sorpresang mipahihayon og Oplan Galugad o Oplan Greyhound ang hiniusang pwersa sa kapulisan mga alas 8:00 sa buntag sulod sa Misamis Oriental Provincial Jail (MOPJ).
Ang hiniusang operasyon gipangunahan sa Provincial Intelligence Branch sa pagpanguna ni Police Major Gil Agpaoa, Provincial Drug Enforcement Unit (PDEU) pagpanguna ni Police Captain De Oro; Police Captain Abastillas ang tracker team; PSMS Christian Aguillon, personahe sa Regional Intelligence Division uban sila si MOP Jail Overseer Roel Factura ug MOP Jail Warden Dominador Tagarda.
Ang operasyon miresulta sa pagkakumpiska sa tulo ka pakete sa gitouhang shabu, nagkadaiyang ilegal drug paraphernalia, 20 ka mga cellphone lakip mga chargers; 15 ka mga giimprobar nga kutsilyo ug mga baraha.
Tanan nga mga nakumpiskang ilegal nga gamit sulod sa prisohan ang anaa karon gikostudya sa MOPJ.
Una na nga gibutyag ni Jail Warden Tagarda sa SunStar Superbalita nga gidili sulod sa prisuhan ang cellphone kini human ning bag-o lang nag-trending sa social media ang video sa usa ka hubo nga priso nga gipasayaw og budots.
Sorpresa sab ang Oplan Galugad nga gakahitabo aron ang mga priso dili makabantay.