NAKABSAN sa kinabuhi ang usa ka suspek sa pagpanglugos human giingong misukol sa kapulisan dihang gisilbi ang search warrant alang niini mga alas 10:28 Miyerkules sa gabii, Pebrero 26, sa Purok 5, Barangay Butadon, Kapatagan, Lanao del Norte.
Nadawat sa kapulisan sa Kapatagan Municipal Police Station ang report nga anaa ang presensya sa rape suspek nga si Demetrio C. Fuentes, taga Purok 1, Vansarvil, Kapatagan, Lanao del Norte kinsa adunay warrant of arrest sa kasong rape o kasupakan sa R. A. 7610 nga giisyu ni Hon. Judge Alberto P. Quinto, sa Regional Trial Court sa Branch ug wala kini piyansa nga girekomendar.
Tungod niini, miresponde ang kapulisan sa pagpanguna sa hepe nga mao si Police Major Rodolfo M. Dongiapon ug niadto sa lugar uban ang pila ka personahe.
Naabtan sa kapulisan ang suspetsado nga naglingkod apan dili kini maklaro tungod sa silaw sa headlight sa patrol.
Giingong mga 3 metros ang kalay-on dihang namatikdan sa suspek ang presensya sa kapulisan kalit kining namusil maayo na lamang nakahupo si Police Master Sergeant Geoffrey Paglinawan.
Mibalos niini ang hepe nga si Police Major Dongiapon gamit iyang kalibre 9mm ug gipusil ang suspek hinungdan sa pagkaigo niini.
Gidala pa kini sa Kapatagan Provincial Hospital apan gideklarar nga dead on arrival ni Dr. Jamaica Dimaporo.
Narekober sa posisyon niini ang kalibre 38 nga adunay tulo ka buhing bala, adunay upat ka pakete sa gituohang shabu.