PATAY ang usa ka 42 anyos nga habal-habal driver dihang gipusil atubangan sa asawa niini mga alas 6:40 sa hapon niadtong Martes, Pebrero 25, sa Purok 4, Puga-an, Iligan City.
Giila ang biktima nga mao si Martino G. Surban Jr., taga Calawag, Pugaan, Iligan City.
Sa inisyal nga imbestigasyon sa Iiligan City Police Station 1 ubos kang Police Major Rixell Torayno, nasuta nga kining biktima sakay sa motorsiklo diin angkas ang asawa niini paingon unta sa sentro sa siyudad.
Apan pagdangat sa nahitaboan, duha ka mga lalaki sakay usab og motorsiklo ang ilang natabo nagsinggit pa og “gaw” dungan niini gipusil ang biktima.
Misarasay ang motorsiklo human naigo sa ulo ang biktima. Dali kining gidala sa Gregorio T. Lluch Memorial Hospital o Iligan City Hospital apan nakabsan sa kinabuhi.
Ang asawa nga si Elma positibong niila sa suspetsado nga mao si Alvin Archival kon asa gilusad dayon sa kapulisan ang hot pursuit operation ug mga alas 10:30 sa gabii nadakpan si Archival, 38, minyo, usa gihapon ka habal-habal driver.
Gisuta pa sa kapulisan unsay motibo sa pagpamusil niini human suspek pabiling tak-om ang baba karon panahona.