ORMOC CITY, Leyte -- Gisuspenso sa Dakbayan sa Ormoc ang mga aplikasyon sa pagkuha ug pag-renew sa mga sand and gravel permits sa siyudad.
Gisuspenso usab ang exportation sa sand and gravel sa bisan unsang paagi ingon man ang pag-aproba sa tanan nga pending application.
Kini base sa gipagawas nga Executive Oder 17-A ni City Mayor Richard Gomez kahuman sa daghang report maylabot sa mga kalapasan sa mining activities ug sand and gravel operations.
Niadtong Mayo 19, 2017, ang City Mining Regulatory Board (CMRB) ang miisyu og resolusyon sa temporary nga pagsuspenso sa pipila ka industrial ug commercial sand and gravel extraction and operations tungod sa wa paghimo sa ilang rehabilitation plan.
Oktubre 4, 2018, ang Mines and Geosciences Bureau (MGB) nihimo og report nga duna'y kasagaran sa permit holders sa Panilahan River ang wala usab makahimo sa ilang rehabilitation plan.
Abril 30, 2019, ang MGB miisyu og Geohazard Certification nga ang mga permitted areas sa Guitnobongan, Panali-an, Panilahan ug Sumaad rivers peligro na sa pagbaha.
Samtang ang pipila ka parte sa sapa Tigbawan, Panalihan ug Sumaad delikado na usab sa landslide.
Sa gihimo nga joint inspection sa kagamhanan sa Ormoc ug Albuera uban sa MGB, EMB ug National Irrigation Administration (NIA) nakit-an nga duna'y mga flood debris, eroded bank materials ug silt materials sa sand and gravel operation nga nakapugong sa distribution canals sa irrigation system.
Niini, mibahad si Gomez sa mga mosupak sa iyang kamanduan nga kanselahon, i-revoke o i-terminate ang sand and gravel permit.
Subay sa pagsuspenso sa exportation o pagpagawas og mga sand and gravel gikan sa Ormoc, ang mga sakyanan o dumptruck nga masakpan 500 metros gikan sa boundary sa Ormoc paingon sa sunod nga lungsod gikonsidera kini nga nihimo gihapon og pag-transport.
“Export, as used in this order, shall mean to ship, transport, or carry any sand and gravel material, regardless of its source or where processed, outside the shoreline and/or terrestrial territorial limits of Ormoc City regardless of its purpose, provided that ports, whether private or public, and municipal waters shall be construed, for purposes of this order, as outside the territorial limits of Ormoc City,” matod sa kamanduan.
Ang mga permit holders nga wala pa mag-expire ug nagpadayon pa karon sa aktibidad ang hugot nga gimonitor sa kagamhanan kon nibuhat ba sa ilang rehabilitation plan subay sa balaod.
Duna'y mga penalties nga ipahamtang sa mga molapas apan depende kini sa gibug-aton sa kalapasan nga nahimo.
Giawhag sa kagamhanan sa Ormoc ang mga apektado nga moduol sa City Enviroment and Natural Resources sa City Hall. (JKDP)