DUNA may hulga sa Covid-19, apan way makapugong sa pagpahigayon sa Summer Fun Activities sa siyudad sa Mati.
Ang aktibidad himuon Abril ngadto Hunyo 2020.
Ang City Tourism Office ug Tourism Events sa siyudad nakadesidar nga ipadayon ang aktibidad human nga ang Department of Health ug Department of Tourism lakip na Department of the Interior and Local Government miisyu og hiniusang pahayag nga nagtugot sa pagpahigayon og mga tigum sa publiko, basta masunod ug istrikto lang ang pagpatuman sa health safety protocol.
Ang Summer Fun mosipa sa Semana Santa, Abril 9.
Ubang aktibidad sa duha ka bulang kalingawan mao ang Skim Fest (skimboarding competition), Beach Ultimate (frisbee competition), Arts Fest, Beach Volley, Dance Battle, Dive Safari, Dagan-Sikad-Langoy, ug Battle of the Bands.
Gibutyag ni Tourism Officer Dashiel Indelible Jr. nga istrikto nilang ipatuman ang giya gikan DOH kalabot Covid-19.
Sa kasamtangan, suma ni Indelible nga nagapahimangno sila sa tanang tourism-related enterprises sa siyudad nga mohimo og kauagalingon nilang lakang aron malikayan ang pagkatag sa Covid-19 ug maproteksiyunan ang mga bisita.
Padayon sa pagsaka ang ihap sa mga turistang midagsa sa Mati ilabi na panahon sa summer tungod sa lain-laing aktibidad nga giplastar sa lokal nga gobyerno ug pribadong sektor. (Uban ang CIO Mati)