Editoryal: Aron di masamok ang demolisyon

NANAWAGAN karon ang mga residente sa mga balay nga na-demolis kilid sa kalsada sa Father Selga Street, Barangay 8-A sa Davao City na unta mahatagan sila og relokasyon sa gobyerno.

Sila boluntaryo nga nangguba sa ilang mga balay nunot sa pagpatuman sa 60-day Road-Sidewalk Clearing Operation nga gipatuman sa mga barangay subay sa mandu sa Department of the Interior and Local Government (DILG).

Kini nga kamandoan di lang sa Davao City apan lukop kini nasud, mao nang miulpot ang mga barangay kapitan sa pagpatuman, kay kung di nila kini mahimo, sila ang makasohan.

Sa Padre Selga, gibutyag ni Barangay 8-A Kapitan Ariel Lagmay nga paneguraduhon sa barangay nga dunay mahiklingan ang mga residente nga naapektuhan sa operasyon.

Dayag naman gyod unta nga ilegal ang ilang pagtukod og mga barong-barong kilid sa kalsada, gani makita na ang mga haligi nga mipatong na sa semento sa kalsada nga iya gobyerno.

Nasayod na silang ilegal sila nganha ug nakasabot sab sila nga sila papahawaon sa gobyerno mao nang nag-self demolition sila, kay kung ang Ancillary Services Unit (ASU) sa Davao City ang mo-demolis, wa gyod sila'y madawdaw nga mga kahoy ug atop sa ilang mga balay.

Ang City Mayor's Office ug ang barangay naningkamot kung asa mapahiluna ang mga residente. Di mosugod ang mga Duterte sa ilang administrasyon nga dunay mga mag-antus nga katawhan, labi na mga Dabawenyos.

Maayo ang gihimo sa mga residente sa Padre Selga, boluntaryo nga nangguba sa ilang mga balay, usa ka pamaagi aron di na moulbo ang kasamok diha sa demolisyon.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph