Asawa giluthang sa pag-umangkon sa iyang bana

DAVAO DE ORO -- Padayong gitambalan sulod sa ospital ang 60 anyos nga misis nga gipusil sa pag-umangkon sa bana niini sa Purok Durian, Barangay Union, Monkayo alas 9:30 sa buntag, Miyerkules, Pebrero 26.

Ang biktima giila nga si Flordeliza Amparo Galman, minyo, molupyo sa nahisgutang dapit.

Base sa inisyal nga imbestigasyon, nasayran nga nagluto lang ang biktima og suman sa kusina sa dihang gipusil sa suspek tumong sa tuong bahin sa kilid sa lawas gamit ang wala matinong kalibre sa armas.

Ang biktima gidali pagdala ngadto sa Davao De Oro Provincial Hospital sa lungsod sa Montevista aron nga matambalan.

Gibutyag nga samtang atua sa ospital ang biktima, nakasulti sa mga pulis nga ang mipusil kaniya mao ang suspek nga ginganlan og Nelson Castillo Galman, kinsa pag-umangkon sa bana niini.

Matud pa nga dayong nagpahigayon og hot pursuit operation ang kapulisan sa Monkayo Municipal Police Station ug nasikop ang suspek.

Si Police Staff Sergeant Aldrin Balaga, imbestigador sa Monkayo Municipal Police Station, nagbutyag dihang nahinabi sa Superbalita Davao pinaagi sa selpon nga ang hinungdan sa krimen mao ang bangi sa yuta.

(Dexter T. Visitacion)