Nagkaon sa restawran gipatay

DAVAO. Makita ang biktima nga nahay-ad human gipusil samtang nagkaon sa restawran sa may dalang Arellano, duol sa old city hall sa siyudad sa  Tagum. (Hulagway kuha ni Richie Villanueva)
DAVAO. Makita ang biktima nga nahay-ad human gipusil samtang nagkaon sa restawran sa may dalang Arellano, duol sa old city hall sa siyudad sa Tagum. (Hulagway kuha ni Richie Villanueva)

DAVAO DEL NORTE -- Giingong adunay hulga sa kinabuhi sa milabay'ng tuig ang 27 anyos nga lalaki nga gipatay samtang nagkaon sa restawran sa may dalang Arellano sa Tagum City alas 6:10 sa gabii niadtong Huwebes, Pebrero 27.

Kini ang gibutyag ni Lieutenant Colonel Pablito Odias, bag-ong chiefsa Tagum City Police Station, nga nahinabi sa Superbalita Davao pinaagi sa selpon kinsa nag-ila sa biktima nga si Maximo Polinar Ojano, molupyo sa Talisay Gante Road, Barangay Magugpo West, sa nahisgutang siyudad.

Gibutyag nga ang biktima suki na sa kan-anan, hinungdan nga kompiyansang nagkaon.

Apan giduol siya og wala mailhing armado ug sa walay daghang istorya, gipusil tumong sa ulo nga miresulta sa hinanaling kamatayon.

Narekober gikan sa crime scene ang usa ka basiyo sa bala sa kalibre .45 nga pistola.

Gisulti ni Odias nga sa pagkakaron, wa pa silay matumbok nga motibo sa kamatayon sa biktima apan hugtanon ang gihimo nilang imbestigasyon sa pagsulbad sa krimen.

Kahinumdoman nga niadtong Miyerkules, alas 7:00 sa buntag, gipatay sab sa nahisgutang siyudad ang kanhi sundalo nga si Cornelio Migo samtang padung nga naghatud sa iyang anak sa tunghaan.

Ang sunod-sunod nga pagpamusil ikaduhang hitabo na human milingkod isip bag-ong chief of police sa Tagum City Police Station si Odias sa dihang

gihulipan niini si Lieutenant Colonel Ariel B. Acala niadtong Pebrero 17, 2020. (Dexter T. Visitacion)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph