ANG bulan sa Marso sa matag tuig giila sa gobyerno nga Fire prevention month. Mao ni ang bulan sa matag tuig nga di lang wang-wang sa siren sa mga trak sa bombero ang angay pangandaman, apil na ang daghang gimbuhaton kon unsaon pagbatok ang makalilisang nga alarma sa sunog.
Daghang seremonyas ang pasiugdahan isip kabahin sa awareness campaign sa gobyerno unsaon nga malikayan ang sunog nga nilamoy og minilyon ka pisos nga kabtangan ug nikalas og daghang kinabuhi.
Ubos sa estraktura sa gobyerno, ang Bureau of Fire Protection, sama sa PNP ug BJMP gidumala kini sa Department of Interior & Local Government (DILG). Sa ato pa sama sa pagpangisog sa DILG batok sa mga local government unit (LGU) paghawan sa mga karsada sa nagkadaiyang sagabal, mahimo kaayong imando niini ang paghimo og mga kongkretong lakang unsaon nga malikayan ang sunog apil na ang klaro ug epektibong programa sa pagrespondi sa mga bombero sa higayon nga dunay alarma.
Sama pananglit sa paghawan sa kadalanan batok sa overnight parking, diin kining maong mga sakyanan nga giparada nahimong sagabal sa pagrespondi sa mga fire truck padung sa dapit nga gialarma. Apan di lang kay kutob ra dinhi.
Ang malungtaron nga programa diha sa mga sitio ilabi na sa mga suok nga bahin sa barangay nga way karsada nga kaagian sa mga fire truck unta matutukan. Sama sa sunog sa Sitio Tabucanal sa Barangay Poblacion-Pardo, dakbayan sa Sugbo niadtong buntag sa Pebrero 3, 2019.
Hilabihang daghana sa mga balay ang naugdaw. Subong palandungon kay may kinabuhi nga nakalas. Angay panaminan sa gobyerno ang maong alarma.
Unsay may gihimo sa mga bombero apil na ang mga volunteer sa maong alarma? Ang naandan nga pagrespondi sa dihang niulbo ang dakong kayo maoy nasaksihan. Pero mahibulong ka kay ang mga fire truck hilabihang layua ra sa mga balay nga gilampornas sa dakong kayo. Dugay nga nakapasirit kay kinahanglan pa nga sumpay-sumpayon ang hose padung sa nasunogan. Nikaon pa og daghang minutos una nahuman ang sinumpayay.
Nakapasirit man tuod pero daghan nang panimalay ang naugdaw. Tungod kay may gilay-on ang nahimutangan sa fire truck natural lang nga apektado ang pressure sa tubig. Ang hinungdan kay way karsada nga makapaduol sa mga fire truck sa fire scene. Dinhi sa ato ug dinha sa inyoha pila ba ka sitio ang may susama og kahimtang sa Tabucanal nga hilabihan kasudlonon. Sa kadaghan na sa sunog nga niigo sa maong dapit nagpabilin damgo alang sa mga molopyo nga kaablihan kini og karsada
Matod pa sa usa sa molopyo, natigulang nalang siya, kutob ra gyud sa sukod sukod ang nahitabo. Way ayo.