NAKIBHAN angan na usab ang pagsalig sa publiko ngadto sa atong mga kapulisan niining pagkabunggo ni Police Corporal Marlito Portugueza, ang assistant investigator sa Waterfront Police Station.
Si Portugueza nasakpan ug miangkon nga siya ang mikawat sa 12 ka mga armas nga gi-surrender sa mga tag-iya samtang gihikay pa ang mga papelis alang sa lisensiya niini.
Nadiskobrihan ang pagpangawat sa dihang ang usa sa mga tag-iya ang mokuha na unta sa iyang armas kay nahuman na og asikaso ang mga dokumento niini sa pagpalensiya.
Naghinamhinam na gyud unta ang tag-iya, apan sa unsa bang pagkaunsa, nasuta man sa kustodiyan nga wala na kini sa locker nga ilang gidepositohan.
Dala ang kakulba, wa gilayon maglangan si P/Maj. Joemar Pomarejos, ang hepe sa Waterfront Police Station, sa paghimo og dinaliang pakisusi ug imbestigasyon.
Ug didto milutaw ang pangalan ni Portugueza, molupyo sa Deca Homes sa Dumlog, dakbayan sa Talisay, hinungdan nga gihimo ang follow up operation ug nasikop gilayon kini.
Kini si Portugueza giingong nadestino kaniadto sa Drug Enforcement Unit pero gibalhin sa ilang hepe kay gidudahan nga miduwa usab sa gidiling drugas.
Sa ato pa, dili halayo ang posibilidad nga kining pulisa migamit usab sa maong modus sa dihang nadestino pa kini sa DEU. Kuhaan ang mga nasakmit nga gidiling drugas ug ibaligya ra usab og balik.
Kining gihimo ni Portugueza dili lang pagpakauwaw sa iyang kaugalingon ug sa iyang kabanay kon dili ngadto sa tibuok puwersa sa kapulisan. Iya na usab nga giduhigan og laing lama ang organisasyon.
Hinaot nga tinud-on na gyud sa mga opisyal sa PNP ang hingpit nga paglimpiyo sa ilang organisasyon kay kon dili kinsa pa man unyay mosalig kanila.