NAGKAGAMAY karon ang kalibutan sa mga tawo nga wanted nunot ning subsob nga operasyon sa kapulisan sa pagpangita kanila.
Laing duha pa ka mga most wanted person nadakpan sa mga sakop sa Regional Intelligence Unit (RIU) 7, inabagan sa Regional Mobile Force Company. Usa sa mga akusado nahimong albularyo sa Dakbayan sa Mandaue human magtago-tago.
Si Police Lt. Col. Arturo Bruial, regional chief sa RIU sa Central Visayas, maoy nangu sa operasyon.
Unang nadakpan Huwebes, alas 11 sa buntag sa mga pulis si Roy (di tinuod nga ngan), taga Sityo Magkabayo, Barangay Capio-an, lungsod sa Argao, habagatang Sugbo. Si Roy nagdigamo alang sa ilangh paniudto dihang nadakpan.
Siya gidakop pinasikad sa alyas warrant of arrest nga giisyu ni Judge Jennifer Chavez Marcos sa Branch 51 didto sa Carmen, Bohol.
Si Roy nag-atubang og mga upat ka mga kasong rape, kinsang biktima iyang anak.
Way piyansang gitugot ang korte alang sa iyang temporaryong kagawasan.
Laing most wanted person wa na kalihok dihang niabot ang mga pulis sa iyang gipuy-an sa Barangay Casili, Dakbayan sa Mandaue.
Si Nino Monroid, 44, gidakop pinasikad sa warrant of arrest sa kaso nga murder nga giisyu ni Judge Ulric Cañete sa Branch 55 sa Dakbayan sa Mandaue.
Way piyansa nga gitakda ang korte.
Dugang ni Brual nga si Monroid dunay nay patong sa ulo nga P135,000 nga gitanyag sa Department of the Interior and Local Government (DILG) kon kinsa ang makatudlo sa pagdakop kaniya.
Si Monroid, sa pakighinabi sa Superbalita Cebu, niangkon nga siya ang nipatay sa iyang ig-agaw nga si Elmer Tan niadtong Hulyo 2008 sa usa ka imnanan sa Barangay Umapad, Dakbayan sa Mandaue.
Apan depensa ni Monroid nga di si Tan ang iyang tuyo, kon di ang kauban niini.
Iyang gikaaway ang mao nga tawo sa dihang nasuko nga iyang gibadlong sa paggamit og drugas.
Human sa hitabo, nibalhin siya og puyo sa Negros Oriental ug human sa tulo ka tuig, nibalhin sa kaulohan.
Niadtong 2015, nibalik siya sa Dakbayan sa Mandaue ug nahimong albularyo. (BBT)