MOKABAT sa labing minos P9 milyunes kapin nga balor sa illegal drugs ang nasakmit sa kapulisan managlahing mga operasyon.
Usa ka high value target (HVT) nasikop sa kapulisan sa Dakbayan sa Mandaue human nakuhaan og P6.79 milyones nga balor sa gituohang shabu atol sa ilang follow-up nga buy-bust sa FF. Cabahug st., North Recalamation Area, Mandaue City, Huwebes, Pebrero 27, 2020.
Giila ang suspek nga si Edsan Quilaton Canillo, 29, taga C. Padilla st., Barangay Sawang Calero, Cebu City.
Nakuha gikan kang Canillo ang 1.025 kilo sa gituohang shabu nga nagbalor og P6, 970,000. Sigon ni Police P. Lt. Col. Rudolf Franco Oriol, nanguna sa operasyon, nga napahigayonan og buy-bust si Canillo tungod kay usa siya sa contact ni Bryan Ynsulan.
Si Yunsulan nasikop sa buy-bust operation niadtong Miyerkules, Pebrero, 26, 2020.
Si Ynsulan usa sa top ten nga illegal drug personality sa Central Visayas.
Giklaro ni Oriol nga di kaila silang Ynsulan ug Canillo, apan nagkontakay lang sila tungod sa negosyo nga pagpamaligya sa gidiling drugas.
Gituohang lakip ang duha ka personalidad sa usa ka local nga drug group, apan di pa mabutyag ni Oriol ang ngalan sa sources ani nila nga anaa sa sulod sa Cebu Provincial Detention and Rehabilitation Center (CPDRC) ug Cebu City Jail.
“Naa tay coordination sa regional office para sila na pud ang mopahigayon sa mga succeeding operation,” sigon ni Oriol.
Ang mga transaksyon ni Canillo anaa sa Cebu City, Mandaue City, Lapu-Lapu City ug maabot og pamaligya sa ubang parte sa probinsya sa Sugbo.
Gibana-bana nga makabaligya si Canillo og lima ka kilo sa usa ka semana. Gisuwayan og kuha sa Superbalita Cebu ang habig ni Canillo, apan “no comment” lang siya.
Siya nanawagan sa iyang inahan nga duawon siya sa Mandaue City Police Office Headquarters kon diin siya gi-detain.
Gikan sa igsuon
Nasikop sa mga sakop sa City Intelligence Branch sa Cebu City Police Office ang High Value Individual sa regional level atol sa buy bust sa Peace Valley, Barangay Bulacao, Siyudad sa Sugbo alas 12:30 sa kaadlawon, Pebrero 28.
Ang nadakpan giila nga si Wesley Alipoyo Chua, 34, nagpuyo ra usab sa dapit.
Nakuha gikan kang Chua ang 405 gramos sa gituohang shabu nga mobalor ang tanan og P2,754,000. (AYB, BBT)