SUPERBALITA CEBU

DOH: 7 ka Koreans wa pa gyud makit-i

WA PA DIAY KIT-I. Si Department of Health (DOH) 7 Regional Director Jaime Bernadas (wala) mibutyag sa press conference sa Kapitolyo nga pito sa 26 ka South Koreans wa pa makit-i. Si Gobernador Gwendolyn Garcia mipahimangno niadtong mamakak nga mga turista labot sa impormasyon sa ilang health cards nga sila makamulta o kaha mapriso. Uban kanilang Bernadas ug Garcia si Andrew Harrison, chief executive advisor, GMR Megawide. (Arvie Veloso)

SUKWAHI sa unang taho sa Department of Health (DOH) 7 nga ila nang nasubay ang tanan nga nga Korean nationals nga gikan sa Daegu City sa North Gyeongsang, Probinsya sa South Korea, gipahibawo sa buhatan nga pito sa mga turista ang wala pa makit-i.

Kini maoy gipahibawo ni DOH 7 Regional Director Dr. Jaime Bernadas atol sa ilang tigom ni Gobernador Gwendolyn Garcia sa Kapitolyo, Pebrero 28, 2020.

Ang North Gyeongsang mao ang epicenter sa mga kaso sa coronavirus disease (COVID-19), dala sa novel coronavirus.

Matod ni Bernadas nga ilang nasuta nga wa motug-an sa tinuod ang pito ka mga Koreano nga atol sa pag subay, wa na mapalgi sa ilang gibutyag nga hotels.

“We located them based on the records of the Immigration and the Quarantine. But as of yesterday, we were in the process of locating them and identifying them one by one. But later, we were informed that some of them were nowhere to be found at the addresses that were provided for declaration. So, that’s the problem now that we are facing,” matod ni Bernadas sa mga tigbalita.

Nganong nawala?

May mga anggulo silang gitan-aw karon nga hinungdan sa kalit nga pagka-wala sa mga turista. Gawas nga wa kini mo tug-an sa tinuod nga puy-an, posible nga nibiya na kini sa syudad o sa nasud.

Kon wa pa kini makalarga, posible usab nga nibalhin kini og lain nga hotel.

Tungod niini, nangayo og tabang ang kagamhanan sa lalawigan sa Sugbo ug DOH sa kapulisan nga madali ang pag pangita sa pito ka mga turista tungod kay ipaubos sa mandatory quarantine.

“We had seek the assistance of the Korean consulate and the assistance of PNP to locate them as soon as possible,” matod ni Bernadas. Gimandoan usab ni Garcia ang kapulisan nga mosusi sa mga hotel, adlaw ug gabii, kon nagpabilin ba kini sa maong puy-anan.

“It’s just because of this that I have given the orders to immediately see to it that the remaining 19 who were previously on self quarantine will be placed on mandatory quarantine with the PNP expected to monitor and keep a round-the-clock surveillance in all the hotels they are located in,” pasabot ni Garcia.

Ang 19 kanila padayon nga gi-monitor sa lokal nga Kagamhanan sa Dakbayan sa Lapu-Lapu ug Sugbo. Nag-edad kini og 6 anyos ngadto na sa 56 anyos ang labing hamtong.

Una na nga nimando si Bernadas nga magpabilin una ang mga turista sa ilang mga kwarto ug monitoron sa sakop sa DOH.

Giabisohan ang mga staff sa hotel nga magsul-ob og protective equipment ug kanunayon ang paghinlo ug paghunaw.

Ang mga turista tawgon na nga Persons Under Monitoring (PUM) sanglit gikan man sila sa lugar nga nagpositibo sa COVID-19.

PUM

Duha ka options ang gitanyag sa lalawigan alang sa mga PUM.

Mamahimo sila nga mopaubos sa 14 ka adlaw nga quarantine sa hotel o mopauli sa ilang nasud. Matod sa DOH 7 nga wa pa hinuo’y mipakita kanila og simtomas sa Covid-19.

Kompyansa hinuon si Bernadas nga masubay sa dali nga panahon ang pito ka mga turista pinaagi sa pagtinabangay.

Sa uwahing datos nga natala sa DOH, may 194 ka mga PUM ug siyam ka mga Persons Under Investigation (PUI).

Tungod sa padayon nga pagsaka sa datos sa mga nataptan na sa COVID sa South Korea, miluwat og bag-o nga kamandoan si Garcia pag-extend sa pagpatuman sa mga protocol alang sa 14 ka adlaw nga quarantine sa tanan nga mga turista o pasahero nga gikan sa mga syudad sa North Gyeongsang, Daegu City ug rehiyon sa Cheongdo. (ANV)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph