ARON pagsigurong di na madugangan ang gidaghanon sa mga traysikol nga mobiyahe sa Dakbayan sa Lapu-Lapu, idili na ang pagbuhat og mga sidecar kon way pagtugot sa kagamhanan.
Kini ang gipahibawo ni Lapu-Lapu City Mayor Junard “Ahong” Chan human nasuta nga mao kini ang rason nganong daghan ang nagbiyaheng tricycle sa dakbayan nga colorum kun way prangkisa.
Kabahin usab ang kamandoan sa paghimo og estriktong mga lagda kalabot sa tricyle partikular na ang pagdili na niini sa pagbiyahe sa mga national highway subay kamandoan sa Department of the Interior and Local Government (DILG).
Ang Dakbayan sa Lapu-Lapu maoy usa sa mga dakbayan nga ang mga tricycle maoy nagsilbing nag-unang transportasyon sa publiko. Gimandoan na ni Chan ang City Traffic Management System (CTMS) sa paglista kon pila kabuok lehitimong tricycle nga nagbiyahe sa dakbayan.
Kini aron ila na usab masugdan pagpatuman ang mga lagda kalabot sa ilang mga rota nga sundon sa higayon nga idili na sila sa national highway.
Sa pakisusi ni Chan, nasuta niini nga adunay 2,000 ka mga colorum tricycle nga nagdagan sa dakbayan nga maoy mas nakapahuot sa karsada.
Kon ugaling mahunong na pagbiyahe ang mga colorum nga tricycle kon ila na kining mailhan dungan usab sa higpit nang pagdili kanila sa national highway, hayan maluag na unya ang dagan sa trapiko. (GCM)